কেন্দ্ৰীয় চৰকাৰৰ ১২ বছৰীয়া সংসদীয় ইতিহাসত মচি পেলাব নোৱাৰা এক দাগ সানিলে বিৰোধীয়ে। লোকসভাত প্ৰয়োজনীয় দুই-তৃতীয়াংশ সংখ্যাগৰিষ্ঠতা লাভ কৰাত ব্যৰ্থ হোৱাৰ পাছতেই শুকুৰবাৰে সন্ধিয়া চৰকাৰৰ আটাইতকৈ অভিলাষী ‘নাৰী শক্তি বন্দন অধিনিয়ম’ অৰ্থাৎ মহিলা সংৰক্ষণ বিধেয়কখন ধৰাশায়ী হয়। নিৰ্বাচনৰ পূৰ্বে চৰকাৰী পক্ষৰ বাবে এই আইনী পৰাজয় এক বৃহৎ ৰাজনৈতিক মোক্ষম আঘাত হিচাপে চিহ্নিত হৈছে।
প্ৰধানমন্ত্ৰী নৰেন্দ্ৰ মোদীৰ ‘বিবেক ভোট’ৰ আৱেদন আৰু গৃহমন্ত্ৰী অমিত শ্বাহৰ আশ্বাসক সম্পূৰ্ণৰূপে প্ৰত্যাখ্যান কৰে ঐক্যবদ্ধ বিৰোধীয়ে। সংবিধানৰ ১৩১ সংখ্যক সংশোধনী বিধেয়কখনৰ সপক্ষে ২৯৮ টা ভোট পৰাৰ বিপৰীতে ইয়াৰ বিৰোধিতা কৰে ২৩০ গৰাকী সাংসদে। বিধেয়কখন গৃহীত হ’বলৈ নিম্ন সদনত ৩৫২ গৰাকী সাংসদৰ সমৰ্থনৰ প্ৰয়োজন আছিল যদিও বিৰোধীৰ অনমনীয় স্থিতিৰ বাবে এতিয়া মুখ ঠেকেচা খাবলগীয়া হ’ল চৰকাৰী পক্ষই।
বিধেয়কখনক কেন্দ্ৰ কৰি সৃষ্টি হোৱা এই উত্তপ্ত পৰিস্থিতিৰ মাজতে সংসদীয় পৰিক্ৰমা মন্ত্ৰী কিৰেন ৰিজিজুৱে এক গুৰুত্বপূৰ্ণ সিদ্ধান্ত গ্ৰহণ কৰিছে। এই মূল বিধেয়কখনৰ সৈতে জড়িত থকা সমষ্টি পুনৰ নিৰ্ধাৰণকে ধৰি আন দুখন বিধেয়কো চৰকাৰে এতিয়া প্ৰত্যাহাৰ কৰিব বুলি জানিবলৈ দিয়ে কেন্দ্ৰীয় মন্ত্ৰীগৰাকীয়ে। ইয়াৰ ফলত মহিলা সংৰক্ষণক লৈ মোদী চৰকাৰে গ্ৰহণ কৰা সমগ্ৰ প্ৰক্ৰিয়াটোৱেই বৰ্তমান অনিশ্চয়তাৰ মাজলৈ ঠেলি দিছে বিৰোধীয়ে।
গৃহমন্ত্ৰী অমিত শ্বাহে দক্ষিণ ভাৰতৰ আসন কৰ্তনৰ আশংকাক নস্যাৎ কৰি সমষ্টি ৫০ শতাংশলৈ বৃদ্ধিৰ প্ৰস্তাৱ দিছিল যদিও তাত পতিয়ন নগ’ল ইণ্ডিয়া ব্লকৰ সদস্যসকল। জাতিগত লোকপিয়ল আৰু দক্ষিণৰ ৰাজ্যসমূহৰ প্ৰতিনিধিত্বক লৈ থকা বিৰোধীৰ সন্দেহৰ বাবেই চৰকাৰী পক্ষই এই বৃহৎ সংসদীয় যুঁজত পৰাজয় বৰণ কৰে। এই ফলাফল ঘোষণা হোৱাৰ পাছতেই বিজেপিয়ে বিৰোধীক ‘নাৰী বিৰোধী’ আখ্যা দি সংসদ ভৱনৰ চৌহদত প্ৰতিবাদ আৰম্ভ কৰিছে।
বিৰোধীৰ এই ঐক্যবদ্ধ প্ৰহাৰে ত্ৰয়োদশ বছৰত ভৰি দিয়া মোদী চৰকাৰৰ সংসদীয় আধিপত্যক পোনপ্ৰথমবাৰৰ বাবে তীব্ৰ প্ৰত্যাহ্বান জনায়। যদিও পূৰ্বতে কৃষক আইনৰ দৰে বিষয়ত চৰকাৰে পিছুৱাই আহিবলগীয়া হৈছিল, সংসদৰ মজিয়াত চৰকাৰী বিধেয়ক এখনৰ এনে লজ্জাজনক পতন এক বিৰল ঘটনা। শনিবাৰে সংসদৰ বাজেট অধিবেশনৰ অন্তিমটো দিনত এই বিষয়টোক লৈ পুনৰ তীব্ৰ বাকযুদ্ধ হোৱাৰ সম্ভাৱনা প্ৰকট হৈ পৰিছে।
About the Author
