অসম-অৰুণাচল সীমান্তত পুনৰ সৃষ্টি হৈছে উত্তেজনাপূৰ্ণ পৰিৱেশৰ। সীমান্তৰ বিবদমান অঞ্চলত অৰুণাচল প্ৰদেশৰ ফালৰ পৰা অহা অচিনাক্ত লোকৰ সৈতে সংঘাতৰ মাজতে গুলীচালনাত অসমৰ ১৮ জন লোক আহত হয়। আহতসকলৰ ভিতৰত চাৰিজনৰ অৱস্থা সংকটজনক বুলি জানিব পৰা গৈছে।
অৰুণাচল প্ৰদেশৰ সৈতে সীমান্ত বিবাদে সৃষ্টি কৰা উত্তেজনাৰ মাজতে মিংমাং বস্তিত সংঘটিত হয় এই ঘটনা। সীমান্ত অঞ্চলত বেদখলৰ অভিযোগক কেন্দ্ৰ কৰি দুই পক্ষৰ মাজত প্ৰথমে সংঘাতৰ সূত্ৰপাত হয়। পৰিস্থিতি অধিক উত্তপ্ত হৈ পৰাৰ পিছতে অচিনাক্ত লোককেইজনে গুলীচালনা কৰে বুলি অভিযোগ উঠিছে।
গুলীচালনাত আহত লোকসকলক ততাতৈয়াকৈ চিকিৎসালয়ত ভৰ্তি কৰোৱা হয়। ইয়াৰে সংকটজনক অৱস্থাত থকা চাৰিজনক ডিব্ৰুগড় চিকিৎসা মহাবিদ্যালয় হাস্পতাললৈ স্থানান্তৰ কৰা হৈছে।
ইফালে, পৰিস্থিতি নিয়ন্ত্ৰণৰ বাবে অসম আৰু অৰুণাচল প্ৰদেশৰ মুখ্য সচিবে আলোচনাত মিলিত হোৱাৰ লগতে দুয়োখন ৰাজ্যৰ আৰক্ষী সঞ্চালক প্ৰধানেও সমন্বয়ৰে কাম কৰি থকা বুলি মুখ্যমন্ত্ৰী হিমন্ত বিশ্ব শৰ্মাই জানিবলৈ দিয়ে। ঘটনাস্থলীলৈ অসম আৰক্ষীৰ অতিৰিক্ত বাহিনী প্ৰেৰণ কৰা হৈছে।
মুখ্যমন্ত্ৰী হিমন্ত বিশ্ব শৰ্মাই কয় যে পৰিস্থিতি অধিক অৱনতি ঘটিবলৈ নিদিয়াকৈ উত্তেজনা প্ৰশমনৰ ব্যৱস্থা ল’বলৈ অসম আৰক্ষীক নিৰ্দেশ দিয়া হৈছে। একে সময়তে অসমৰ ভূমিৰ এক ইঞ্চিও যাতে কোনো কাৰণতে আনৰ দখললৈ নাযায়, সেই বিষয়তো অসম আৰক্ষীক কঠোৰ নিৰ্দেশ দিয়া হৈছে বুলি মুখ্যমন্ত্ৰীগৰাকীয়ে জানিবলৈ দিয়ে।
মন কৰিবলগীয়া যে, অসম আৰু অৰুণাচল প্ৰদেশৰ মাজৰ সীমা বিবাদ নতুন নহয়। কেইবা দশক ধৰি চলি অহা এই বিবাদৰ সমাধানৰ বাবে দুয়োখন ৰাজ্যই আলোচনাৰ জৰিয়তে সীমা নিৰ্ধাৰণৰ প্ৰক্ৰিয়া আগবঢ়াই আহিছে। তথাপি সীমান্তৰ কেইবাটাও অঞ্চল এতিয়াও স্পৰ্শকাতৰ হৈ আছে। সাম্প্ৰতিক সংঘাতে সেই অঞ্চলসমূহত পুনৰ উত্তেজনা বৃদ্ধি কৰিছে।
About the Author
