আলফা স্বাধীনৰ সেনাধ্যক্ষ পৰেশ বৰুৱাৰ ওচৰত ক্ষমাপ্ৰাৰ্থনা জনোৱাৰ বাবে মুখ্যমন্ত্ৰী হিমন্ত বিশ্ব শৰ্মাই চাহ জনজাতি আৰু নিয়োগ মন্ত্ৰী সঞ্জয় কিষাণলৈ শ্ব’-ক’জ জাননী প্ৰেৰণ কৰিছে।
মুখ্যমন্ত্রী শর্মাই মন্ত্রী সঞ্জয় কিষাণক কিয় আলফা (স্বাঃ) প্রধান গৰাকীৰ ওচৰত ক্ষমা খুজিছে সেই সন্দর্ভত উত্তৰ দিবলৈ কয়৷
মন্ত্ৰী সঞ্জয় কিষানে পৰেশ বৰুৱাক মিছলীয়া বুলি অভিহিত কৰাৰ অভিযোগত ক্ষমা খুজিবলৈ ২৪ ঘণ্টীয়া আলটিমেটাম দিয়াৰ পিছত ১৫ মে’ত ৰাজহুৱাভাৱে ক্ষমা খুজিছিল।
তেওঁ কয়, ‘আমাৰ মুখ্যমন্ত্ৰী হিমন্ত বিশ্ব শৰ্মাই অসমত শান্তি প্ৰতিষ্ঠা কৰিবলৈ আলফাক আলোচনাৰ মেজলৈ আনিবলৈ এক পৰিৱেশ সৃষ্টি কৰাৰ চেষ্টা কৰিছে। আৰু সেই পৰিৱেশটো বিঘ্নিত হোৱাটো মই নিবিচাৰো৷ মই মাত্ৰ কিছুমান যুৱকে আলফাত যোগদান কৰাৰ কথা কৈছিলো আৰু যদি মোৰ মন্তব্যই পৰেশ বৰুৱাৰ আৱেগক কোনো ধৰণে আঘাত কৰে, তেন্তে তাৰ বাবে মই ক্ষমা বিচাৰিছো।’
আলফা (আই)য়ে সকীয়াই দিয়ে যে কিষানক তিনিচুকীয়া আৰু ডিব্ৰুগড় জিলাৰ ৰাজহুৱা অনুষ্ঠানৰ পৰা “বয়কট” কৰা হ’ব, যদিহে তেওঁ ২৪ ঘণ্টাৰ ভিতৰত ক্ষমা খুজিব নোৱাৰে।
খবৰ অনুসৰি কিষানে কৈছিল যে আলফা স্বাধীনৰ মুৰব্বী পৰেশ বৰুৱাই চলিত বৰ্ষৰ ফেব্ৰুৱাৰী মাহত সংগঠনটোৰ কেডাৰ বিজু গগৈয়ে নিজৰ শিবিৰত আত্মহত্যা কৰিছিল বুলি মিছা কথা কৈছে।
