পশ্চিম বংগত, মুখ্য বিৰোধী বিজেপিয়ে ৰাজ্যসভাৰ উপনিৰ্বাচনত প্ৰাৰ্থী নিদিয়াৰ কথা ঘোষণা কৰিছে। শেহতীয়াকৈ কংগ্ৰেছ ত্যাগ কৰি টিএমচিত যোগদান কৰা কংগ্ৰেছৰ প্ৰাক্তন সাংসদ সুস্মিতা দেৱক ৰাজ্যসভালৈ মনোনীত কৰিবলৈ সাজু হৈছে। বিজেপি নেতা সুভেন্দু অধিকাৰীয়ে কৈছে যে দলটোৱে ৰাজ্যসভাৰ উপনিৰ্বাচনত তৃণমূল কংগ্ৰেছৰ সুস্মিতা দেৱৰ বিৰুদ্ধে কোনো প্ৰাৰ্থী প্ৰদান নকৰে।
সোমবাৰে এক টুইটযোগে সুভেন্দু অধিকাৰীয়ে কয়, “পশ্চিম বংগত অনুষ্ঠিত হ’বলগীয়া ৰাজ্যসভাৰ উপনিৰ্বাচনৰ বাবে বিজেপিয়ে কোনো প্ৰাৰ্থী মনোনীত নকৰে। ফলাফলটো পূৰ্বনিৰ্ধাৰিত। আমাৰ লক্ষ্য হৈছে অনিৰ্বাচিত মুখ্যমন্ত্ৰী পুনৰ এবাৰ অনিৰ্বাচিত হোৱাটো নিশ্চিত কৰা। জয় মা কালী। “
তাৰ পিছতে তৃণমূল কংগ্ৰেছৰ প্ৰাৰ্থী বিনা প্ৰতিদ্বন্দিতাত জয়ী হোৱাৰ সম্ভাৱনা শক্তিশালী হৈছে। সুস্মিতা দেৱে সোমবাৰে ৰাজ্যসভাৰ উপনিৰ্বাচনৰ বাবে মনোনয়ন দাখিল কৰে। টিএমচিয়ে যোৱা সপ্তাহত পশ্চিম মেদিনীপুৰৰ চাবাঙৰ পৰা মানস ভূঞাই বিধানসভা নিৰ্বাচনত জয়লাভ কৰাৰ পিছত খালী হোৱা ৰাজ্যসভাৰ আসনৰ বাবে সুস্মিতা দেৱক মনোনীত কৰিছিল।
সুস্মিতা দেৱে ২০১৪ চনৰ লোকসভা নিৰ্বাচনত কংগ্ৰেছৰ টিকটত অসমৰ শিলচৰ আসনৰ পৰা সাংসদ হৈছিল। কিন্তু শেহতীয়াকৈ তেওঁ কংগ্ৰেছ এৰি টিএমচিত যোগদান কৰিছিল।
