মঙলবাৰে বাক্সা জিলাৰ বৰমাৰ ১৩নং ৰাষ্ট্ৰীয় ঘাইপথৰ সমীপত দুৰ্ঘটনাত পতিত হৈ মৃত্যুক সাৱটি লয় দুই বাইক আৰোহীয়ে। মৃত যুৱক দুজনক গুৱাহাটীৰ লালমাটিৰ মিন্টু ডেকা আৰু বাক্সাৰ জালাহ গাঁৱৰ ধনমণি দাস বুলি চিনাক্ত কৰা হৈছে। বৰমাৰ ফ্লাই অভাৰৰ ওচৰত পুৱতি নিশা দুৰ্ঘটনাটো সংঘটিত হয় বুলি জানিব পৰা গৈছে।
খবৰ অনুসৰি দুয়োজন যুৱকে এখন বাইকেৰে গুৱাহাটীৰ পৰা জালাহ গাওঁ অভিমুখে গৈ আছিল। সেই সময়তে এখন অচিনাক্ত বাহনৰ সৈতে দুৰ্ঘটনাত পতিত হোৱাত যুৱকদ্বয়ৰ ঘটনাস্থলীতে মৃত্যু ঘটে। পৰৱৰ্তী সময়ত তেওঁলোকৰ মৃতদেহ স্থানীয় লোকসকলে ৰাস্তাৰ কাষত পৰি থকা অৱস্থাত উদ্ধাৰ কৰে।
দুৰ্ঘটনাত পতিত ৰয়েল্ড এনফিল্ড বুলেটখন ঘটনাস্থলীৰ পৰা উদ্ধাৰ কৰা হৈছে। বাহনখনৰ পঞ্জীয়ন নম্বৰ হৈছে এএছ ০১ ডিআৰ ০৫৭২। পিছত ঘটনাস্থলীত বৰমা আৰক্ষী উপস্থিত হৈ মৃতদেহ দুটা উদ্ধাৰ কৰি মৰোণত্তৰ পৰীক্ষাৰ বাবে প্ৰেৰণ কৰে।
