ৰাম মন্দিৰত ভক্তৰ দান আত্মসাতৰ অভিযোগক লৈ দেশজুৰি বিতৰ্ক অব্যাহত থকাৰ সময়তে এইবাৰ ৱাকফ সম্পত্তিক লৈ বিস্ফোৰক অভিযোগ উত্থাপন কৰিলে এগৰাকী মুছলমান ধৰ্মগুৰুৱে। উত্তৰ প্ৰদেশৰ দুয়োখন ৱাকফ ব’ৰ্ডত বৃহৎ কেলেংকাৰী সংঘটিত হোৱাৰ অভিযোগ উত্থাপন কৰি তদন্তৰ দাবী জনালে অল ইণ্ডিয়া মুছলিম জামাতৰ সভাপতি মৌলানা শ্বাহাবুদ্দিন ৰাজভী বাৰেলভীয়ে।
সংবাদমেলত মৌলানা ৰাজভীয়ে কয়, “ৰাম মন্দিৰৰ দান কেলেংকাৰীৰ মূল্য কেৱল কোটি টকাৰ। কিন্তু ৱাকফ সম্পত্তিক কেন্দ্ৰ কৰি হাজাৰ হাজাৰ কোটি টকাৰ কেলেংকাৰী সংঘটিত হৈছে।”
মৌলানা ৰাজভীৰ মতে, চুন্নী আৰু শ্বিয়া দুয়োখন ৱাকফ ব’ৰ্ডৰ কাৰ্যকলাপ সঠিকভাৱে তদন্ত কৰিলে ৰাম মন্দিৰৰ দান কেলেংকাৰীতকৈও বহু ডাঙৰ কেলেংকাৰীৰ তথ্য পোহৰলৈ আহিব।
একেদৰে সমাজবাদী পাৰ্টীৰ সভাপতি অখিলেশ যাদৱৰ বিৰুদ্ধেও অভিযোগ আনি মৌলানা ৰাজভীয়ে কয়, “ৰাম মন্দিৰৰ দান কেলেংকাৰীক লৈ আটাইতকৈ বেছি মাত মাতিছে অখিলেশ যাদৱে। অথচ সমাজবাদী পাৰ্টী ক্ষমতাত থকা সময়ছোৱাতেই আটাইতকৈ বৃহৎ ৱাকফ কেলেংকাৰী সংঘটিত হৈছিল।”
এই অভিযোগৰ ভিত্তিত উত্তৰ প্ৰদেশৰ মুখ্যমন্ত্ৰী যোগী আদিত্যনাথলৈ এখন পত্ৰও প্ৰেৰণ কৰে মৌলানা ৰাজভীয়ে। পত্ৰখনত চুন্নী আৰু শ্বিয়া দুয়োখন ৱাকফ ব’ৰ্ডৰ সম্পূৰ্ণ তদন্তৰ দাবী জনোৱাৰ লগতে সমাজবাদী পাৰ্টীৰ শাসনকালত ৱাকফৰ মাটি অবৈধভাৱে লেনদেনত জড়িত থকাসকলৰ বিৰুদ্ধে কঠোৰ ব্যৱস্থা গ্ৰহণৰ দাবী উত্থাপন কৰে।
অৱশ্যে, মৌলানা শ্বাহাবুদ্দিন ৰাজভীয়ে উত্থাপন কৰা এই অভিযোগৰ সপক্ষে এতিয়ালৈকে কোনো চৰকাৰী তদন্তৰ তথ্য বা প্ৰমাণ ৰাজহুৱা হোৱা নাই।
About the Author
