ৰাজ্যৰ সংসদীয় ইতিহাসত এক নতুন কাৰ্যকালৰ সূচনা কৰি বৃহস্পতিবাৰৰ পৰা আনুষ্ঠানিকভাৱে আৰম্ভ হ’ল ১৬ সংখ্যক অসম বিধানসভাৰ প্ৰথমখন গুৰুত্বপূৰ্ণ অধিৱেশন। নতুন চৰকাৰ গঠনৰ পিছত অনুষ্ঠিত এই প্ৰথমখন সদনৰ প্ৰথমটো দিনাই স্থায়ী অধ্যক্ষ হিচাপে বিনাপ্ৰতিদ্বন্দিতাৰে নিৰ্বাচিত হয় জ্যেষ্ঠ বিধায়ক তথা প্ৰাক্তন মন্ত্ৰী ৰণজিৎ কুমাৰ দাস। ২১ মে’ৰ পৰা ২৬ মে’লৈ চলিবলগীয়া এই অধিৱেশনৰ প্ৰাৰম্ভিক দিনটোৰ কাৰ্যসূচী অত্যন্ত গাম্ভীৰ্যপূৰ্ণ পৰিৱেশত সম্পন্ন হয়।
এই আনুষ্ঠানিক ঘোষণাৰ পিছতেই প্ৰ’টেম অধ্যক্ষ চন্দ্ৰ মোহন পাটোৱাৰীয়ে নিজৰ সাময়িক দায়িত্বৰ পৰা অব্যাহতি লৈ সদন পৰিচালনাৰ সমগ্ৰ কাৰ্যভাৰ নৱ-নিৰ্বাচিত অধ্যক্ষগৰাকীৰ হাতত অৰ্পণ কৰে। ইয়াৰ পূৰ্বে ২০১৬ চনৰ পৰা ২০২১ চনলৈ সৰ্বানন্দ সোণোৱাল নেতৃত্বাধীন চৰকাৰৰ কাৰ্যকালতো সফলতাৰে অধ্যক্ষৰ আসন অলংকৃত কৰি সদন চলোৱাৰ দীৰ্ঘ অভিজ্ঞতা আছে জ্যেষ্ঠ বিজেপি নেতা দাসৰ।
ইফালে, ৰাষ্ট্ৰীয় গীত ‘বন্দে মাতৰম’ ধ্বনিৰে মুখৰিত হৈ পৰে সদনৰ প্ৰাৰম্ভিক কাৰ্যসূচী। ইয়াৰ পিছতেই আৰম্ভ হয় ১৬ সংখ্যক বিধানসভাৰ আটাইকেইগৰাকী নৱ-নিৰ্বাচিত বিধায়কৰ আনুষ্ঠানিক শপতগ্ৰহণ পৰ্ব। প্ৰ’টেম অধ্যক্ষ চন্দ্ৰ মোহন পাটোৱাৰীৰ অধ্যক্ষতাত অনুষ্ঠিত এই শপতগ্ৰহণ অনুষ্ঠানত সৰ্বপ্ৰথমে বিধায়ক হিচাপে পদ আৰু গোপনীয়তাৰ শপতবাক্য পাঠ কৰে মুখ্যমন্ত্ৰী ড০ হিমন্ত বিশ্ব শৰ্মাই।
মুখ্যমন্ত্ৰীৰ পিছতেই কেবিনেটৰ আন চাৰিগৰাকী জ্যেষ্ঠ মন্ত্ৰীয়ে ক্ৰমান্বয়ে শপতগ্ৰহণ কৰে। ইয়াৰ সমান্তৰালভাৱে বিজেপি, কংগ্ৰেছ আৰু তৃণমূল কংগ্ৰেছসহ বিভিন্ন ৰাজনৈতিক দলৰ ১২৬ গৰাকী নৱ-নিৰ্বাচিত বিধায়কে শপত লয়। প্ৰ’টেম অধ্যক্ষ চন্দ্ৰ মোহন পাটোৱাৰীয়ে আটাইকেইগৰাকী বিধায়কক এই শপত বাক্য পাঠ কৰোৱাৰ পিছতেই সদনে স্থায়ী অধ্যক্ষ নিৰ্বাচনৰ প্ৰক্ৰিয়া আনুষ্ঠানিকভাৱে সম্পন্ন কৰে।
About the Author
