প্ৰকৃতিৰ বুকুত বিচৰণ কৰি থাকোঁতেই চিৰবিদায় ল’লে বিশ্বৰ অন্যতম শ্ৰেষ্ঠ বন্যপ্ৰাণী ফটোগ্ৰাফাৰ ডাগ এলানে। নেপালত ট্ৰেকিং কৰি থকা অৱস্থাতে কালি ৭৪ বছৰ বয়সত মৃত্যু ঘটে এইগৰাকী প্ৰখ্যাত চিনেমেট’গ্ৰাফাৰৰ। বিবিচিৰ বিখ্যাত শৃংখলা ‘প্লেনেট আৰ্থ’, ‘ফ্ৰোজেন প্লেনেট’ আৰু ‘দ্য ব্লু প্লেনেট’ৰ দৰে কালজয়ী সৃষ্টিৰ সৈতে ওতপ্ৰোতভাৱে জড়িত আছিল এলান। তেওঁৰ মৃত্যুত সমগ্ৰ বিশ্বৰ প্ৰকৃতিপ্ৰেমী আৰু চলচ্চিত্ৰ মহলত গভীৰ শোকৰ ছাঁ পৰিছে।
ডাগ এলানৰ ব্যৱস্থাপনা সংস্থা ‘জো চাৰ্চবি মেনেজমেণ্টে’ এক বিবৃতিযোগে জনায় যে প্ৰকৃতিৰ মাজত বন্ধু-বৰ্গৰ সৈতে থকা অৱস্থাতে তেওঁ শেষ নিশ্বাস ত্যাগ কৰে। বন্যপ্ৰাণী চলচ্চিত্ৰ নিৰ্মাণৰ ক্ষেত্ৰত এজন অগ্ৰণী পথপ্ৰদৰ্শক হিচাপে স্বীকৃত এলানে প্ৰকৃতিৰ বহু বিৰল আৰু আৱেগিক মুহূৰ্ত তেওঁৰ কেমেৰাত বন্দী কৰিছিল। কৰ্মৰাজিৰ বাবে তেওঁ কেইবাটাও বাফটা আৰু এমি বঁটা লাভ কৰিবলৈ সক্ষম হৈছিল।
উল্লেখযোগ্য যে ডাগ এলানে প্ৰায়ে বিখ্যাত প্ৰকৃতিবিদ ডেভিদ এটেনবৰোৰ সৈতে কাম কৰিছিল। ১৯৫১ চনত স্কটলেণ্ডত জন্মগ্ৰহণ কৰা এলানে ১৯৭৩ চনত সামুদ্ৰিক জীৱবিজ্ঞানত স্নাতক ডিগ্ৰী লাভ কৰিছিল। ১৯৮১ চনত ডেভিদ এটেনবৰোৰ সৈতে হোৱা এক আকস্মিক সাক্ষাৎকাৰেই তেওঁৰ জীৱনৰ গতি সলনি কৰি দিছিল। সেই সময়ত এটেনবৰোৰ এটা সৰু ফিল্ম ক্ৰুক সহায় কৰি থাকোঁতেই তেওঁ বন্যপ্ৰাণী চিনেমেট’গ্ৰাফীৰ প্ৰতি আকৰ্ষিত হয়।
পৰৱৰ্তী সময়ত এণ্টাৰ্কটিকাৰ এম্পেৰৰ পেংগুইনৰ দৃশ্য গ্ৰহণ কৰি তেওঁ বিবিচিক বিক্ৰী কৰিছিল আৰু ইয়াৰ পাছৰে পৰা তেওঁৰ এক সফল যাত্ৰা আৰম্ভ হৈছিল। ডাগ এলানৰ অনুপস্থিতিয়ে বন্যপ্ৰাণী চলচ্চিত্ৰ জগতত এক বৃহৎ শূন্যতাৰ সৃষ্টি কৰিলে। তেওঁৰ সংস্থাই গভীৰ শ্ৰদ্ধাঞ্জলি জনাই কয়, “ডাগ এজন প্ৰকৃত ভদ্ৰলোক আছিল আৰু তেওঁৰ বিৰল প্ৰতিভাই আমাৰ পৃথিৱীখনক দৰ্শকৰ অতি কাষ চপাই আনিছিল।”
About the Author
