মণিপুৰৰ বিধানসভা নিৰ্বাচনৰ পূৰ্বে দেওবাৰে ‘চুপাৰ কপ’ হিচাপে পৰিচিত প্ৰাক্তন আৰক্ষী বিষয়া থৌনাওজাম বৃন্দাই জেডি (ইউ)ত যোগদান কৰে।
ইউনাইটেড নেচনেল লিবাৰেচন ফ্ৰণ্টৰ (ইউএনএলএফ) প্ৰাক্তন অধ্যক্ষ আৰ.কে. মেঘেন ওৰফে ছানাইমাৰ বোৱাৰী থৌনাওজাম বৃন্দাই বিজেপি মন্ত্ৰী থোকচোম সত্যব্ৰত সিঙে প্ৰতিনিধিত্ব কৰা য়াইচকুল সমষ্টিৰ পৰা প্ৰতিদ্বন্দিতা কৰিব।
বৃন্দাই যোৱা বছৰ অক্টোবৰত মণিপুৰ আৰক্ষী সেৱাত অতিৰিক্ত আৰক্ষী অধীক্ষক হিচাপে চাকৰিৰ পৰা পদত্যাগ কৰিছিল।
তেওঁ প্ৰায়ে শিৰোনাম দখল কৰি আহিছে। সেয়া ৩০ কোটি টকাৰ অধিক মূল্যৰ হেৰোইন জব্দ কৰাৰ সন্দৰ্ভত হওঁক বা মুখ্য অভিযুক্ত ড্ৰাগ ব্যৱসায়ীক মুকলি কৰাৰ সময়ত বিশিষ্ট সেৱাৰ বাবে মুখ্যমন্ত্ৰীৰ প্ৰমাণপত্ৰ ঘূৰাই দিয়াৰ ক্ষেত্ৰত হওঁক।
উল্লেখ্য যে, বৃন্দা মণিপুৰৰ ইতিহাসৰ নাৰ্ক’টিক ডিভিজনৰ বীৰত্ব বঁটা লাভ কৰা প্ৰথমগৰাকী আৰক্ষী বিষয়া। ৭১ তম স্বাধীনতা দিৱস উদযাপন অনুষ্ঠানত মণিপুৰৰ মুখ্যমন্ত্ৰীৰ আৰক্ষী পদক তেওঁক প্ৰদান কৰা হৈছিল।
মণিপুৰৰ বিশেষ নাৰ্কোটিক্স ড্ৰাগছ এণ্ড চাইকোট্ৰপিক চাবষ্টেন্স এক্ট (এনডিপিএছ) আদালতে ২০১৮ চনত চান্দেল লুখোচি জৌৰ এডিচিৰ প্ৰাক্তন অধ্যক্ষ আৰু আন ৬ জনক হাই প্ৰফাইল ড্ৰাগ চ’ল গোচৰত নিৰ্দোষী সাব্যস্ত কৰাৰ পিছত বৃন্দাই প্ৰতিবাদত বীৰত্ব বঁটা ঘূৰাই দিয়ে।
সেই সময়ত এনএবি আৰক্ষী থানাৰ অতিৰিক্ত অৰ্থ অধীক্ষক হিচাপে কাৰ্যৰত বৃন্দাই ড্ৰাগছৰ বিৰুদ্ধে চলা অভিযানৰ নেতৃত্ব দি ১৯ জুন, ২০১৮ত লুখোচি জৌ আৰু আন সাতজনক বৃহৎ পৰিমাণৰ ড্ৰাগছ, নগদ ধনসহ গ্ৰেপ্তাৰ কৰিছিল। কিন্তু পৰৱৰ্তী সময়ত এনডিপিএছ আদালতে আটাইকেইজনক অভিযোগমুক্ত ৰায় প্ৰদান কৰাত ইয়াৰ বিৰোধিতা কৰে থৌনাওজাম বৃন্দাই।
