কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পই এমাজন আৰু চৰকাৰী ই-মাৰ্কেটপ্লেচ (GeM)ত বহু প্ৰচাৰিত ইক’ শ্বপ মুকলি কৰিছে। ইয়াৰ জৰিয়তে দাঁতিকাষৰীয়া সম্প্ৰদায়ে প্ৰস্তুত কৰা জৈৱ-বৈচিত্ৰ্যৰ সৈতে জড়িত থলুৱা সামগ্ৰীয়ে বহল ৰাষ্ট্ৰীয় আৰু বিশ্বব্যাপী বজাৰত প্ৰৱেশৰ নতুন পথ লাভ কৰিব।
ইক’ শ্বপ উদ্যোগটোৱে পৰম্পৰাগত দক্ষতা, স্থানীয় সামগ্ৰী আৰু পৰিৱেশ-অনুকূল পদ্ধতিৰ ওপৰত ভিত্তি কৰি নিৰ্মিত সামগ্ৰীৰ প্ৰচাৰৰ জৰিয়তে সংৰক্ষণৰ সৈতে জীৱিকাক সংযুক্ত কৰাৰ কাজিৰঙাৰ নিৰন্তৰ প্ৰচেষ্টাক প্ৰতিফলিত কৰে।
এই মুকলিৰ ফলত দাঁতিকাষৰীয়া গাঁৱৰ শিল্পী আৰু উৎপাদক গোটসমূহৰ বাবে শক্তিশালী বজাৰ সংযোগ সৃষ্টি হোৱাৰ লগতে কাজিৰঙা পৰিৱেশৰ চহকী শিল্প ঐতিহ্যও প্ৰদৰ্শিত হ’ব বুলি আশা কৰা হৈছে।
উল্লেখযোগ্য যে, সম্পূৰ্ণৰূপে কাজিৰঙা ষ্টাফ ৱেলফেয়াৰ ছ’চাইটিয়ে পৰিচালনা কৰা ইক’ শ্বপসমূহে আৰম্ভণিৰ ২ বছৰৰ ভিতৰতে বৃহৎ পৰিমাণৰ সামগ্ৰী বিক্ৰী কৰিছে, যাৰ দ্বাৰা স্থানীয় সম্প্ৰদায় বহুলভাৱে উপকৃত হৈছে।
ইক’ শ্বপত বোৱা সামগ্ৰী, বস্ত্ৰশিল্প, সজ্জাৰ সামগ্ৰী আৰু সম্প্ৰদায়ৰ সদস্যসকলে প্ৰস্তুত কৰা জীৱিকাভিত্তিক অন্যান্য সৃষ্টিকে ধৰি হস্তনিৰ্মিত, পৰিৱেশ-অনুকূল সামগ্ৰীৰ এক শৃংখলা আছে।
পৰ্যটকসকলৰ মাজত জনপ্ৰিয় সম্প্ৰদায়-নেতৃত্বাধীন সামগ্ৰীসমূহৰ ভিতৰত আছে — হাতেবোৱা কাপোৰ, কাঠশিল্প, খাদ্য সামগ্ৰী (আচাৰ আৰু মৌ) আৰু মেটেকাৰ পৰা প্ৰস্তুত পৰিৱেশ-অনুকূল সামগ্ৰী, যিবোৰে অনন্য কাজিৰঙাৰ স্বাক্ষৰ বহন কৰে।
উল্লেখ্য যে, বস্ত্ৰ মন্ত্ৰালয়ৰ সমৰ্থ আঁচনিৰ অধীনত ৩০০ৰো অধিক মহিলাই দক্ষতা কৰ্মশালাৰ পৰা উপকৃত হৈছে, আৰু তেওঁলোকে বোৱা সামগ্ৰীয়ে ইক’ শ্বপত এখন সাজু বজাৰ পাইছে।
এই সামগ্ৰীসমূহৰ মূল বিশেষত্ব হৈছে বস্ত্ৰত পৰম্পৰাগত জীৱ-জন্তুৰ নক্সাৰ সংযোজন আৰু স্থানীয়ভাৱে উপলব্ধ বনজ সম্পদৰ পৰা আহৰণ কৰা প্ৰাকৃতিক ৰঙৰ ব্যৱহাৰ।
সোমবাৰে প্ৰকাশিত এক চৰকাৰী বিবৃতিত কোৱা হৈছে, “এই প্ৰশিক্ষণে বিদ্যমান পৰম্পৰাগত পাৰিপাৰ্শ্বিক জ্ঞান আৰু তাঁতশালৰ দক্ষতাৰ ওপৰত ভিত্তি কৰি শিল্পীসকলক জৈৱ-বৈচিত্ৰ্যৰ জ্ঞানক বজাৰ-উপযোগী সামগ্ৰীলৈ ৰূপান্তৰ কৰাত সহায় কৰিছে। এই সামগ্ৰীসমূহক এমাজন আৰু GeMৰ দৰে জনপ্ৰিয় অনলাইন বিপণন ষ্ট’ৰৰ সৈতে সংযোগ কৰি শিল্পীসকলক উন্নত দৃশ্যমানতা, নিৰন্তৰ চাহিদা আৰু বহল গ্ৰাহক সংযোগ প্ৰদান কৰাৰ লক্ষ্য লোৱা হৈছে।”
About the Author
