চীনৰ ৰাষ্ট্ৰপতি ছি জিনপিঙে অহা ২৩ ছেপ্টেম্বৰৰ পৰা ২৫ ছেপ্টেম্বৰলৈ আমেৰিকা যুক্তৰাষ্ট্ৰ ভ্ৰমণত থাকিব। আমেৰিকাৰ ৰাষ্ট্ৰপতি ড’নাল্ড ট্ৰাম্পৰ আনুষ্ঠানিক নিমন্ত্ৰণমৰ্মে এই ভ্ৰমণৰ আয়োজন কৰা হৈছে।ৰাষ্ট্ৰপতি জিনপিঙে ২৩ ছেপ্টেম্বৰত ৱাশ্বিংটন ডি.চি.-ত উপস্থিত হ’ব, য’ত ৰাষ্ট্ৰপতি ট্ৰাম্পে নিজে ‘জয়ণ্ট বেছ এণ্ড্ৰিউছ’ সামৰিক বিমানবন্দৰত আদৰণি জনাব।
দুয়োগৰাকী বিশ্বনেতাৰ মাজত অনুষ্ঠিত হ’বলগীয়া এই সন্মিলনত বাণিজ্য নীতি, কৃত্ৰিম বুদ্ধিমত্তা আৰু নতুনকৈ সৃষ্টি হোৱা বাণিজ্য সংঘাতসমূহৰ বিষয়ে মূল আলোচনা হ’ব। শেহতীয়াকৈ আমেৰিকাই ৰাছিয়াৰ তেল আৰু গেছ ক্ৰয় কৰা দেশসমূহৰ ওপৰত অতিৰিক্ত শুল্ক আৰু নিষেধাজ্ঞা আৰোপ কৰাৰ পৰিপ্ৰেক্ষিতত এই ভ্ৰমণে বিশেষ তাৎপৰ্য বহন কৰিছে। চীনে স্পষ্ট কৰিছে যে স্বাভাৱিক ব্যৱসায়িক সম্পৰ্কত কোনো তৃতীয় পক্ষৰ হস্তক্ষেপ গ্রহণযোগ্য নহয়।
সন্মিলনৰ পূৰ্বে নিউয়ৰ্কত দুয়োখন দেশৰ উৰ্ধতন বিষয়া—আমেৰিকাৰ বিত্তীয় সচিব স্কট বেছেণ্ট, বাণিজ্য প্ৰতিনিধি জেমিছন গ্ৰীয়াৰ আৰু চীনৰ উপ-প্ৰধানমন্ত্ৰী হে লিফেং—ৰ মাজত ইতিবাচক আৰু গঠনমূলক আলোচনা সম্পন্ন হৈছে। দুয়োখন দেশৰ ৰাষ্ট্ৰপ্ৰধানে বাণিজ্য শুল্ক হ্ৰাসৰ লগতে বিশ্বব্যাপী অৰ্থনৈতিক স্থিৰতা বৃদ্ধিৰ দিশত এক সন্মিলিত পথ উলিয়াবলৈ চেষ্টা চলাব বুলি আশা প্ৰকাশ কৰা হৈছে।
About the Author
