অসম চৰকাৰৰ মহাধিবক্তা হিচাপে পুনৰ ৫ বছৰৰ বাবে নিযুক্তি প্ৰদান কৰা হৈছে দেৱজিৎ লন শইকীয়াক। বৃহস্পতিবাৰে শপত গ্ৰহণৰ পাছত অনুষ্ঠিত প্ৰথমখন কেবিনেট বৈঠকৰ অন্তত এই সিদ্ধান্তৰ কথা ঘোষণা কৰে মুখ্যমন্ত্ৰী ড° হিমন্ত বিশ্ব শৰ্মাই। ৰাজ্যৰ আইনী নেতৃত্বত ধাৰাবাহিকতা ৰক্ষা কৰাৰ স্বাৰ্থতে চৰকাৰে এই গুৰুত্বপূৰ্ণ দায়িত্ব পুনৰ শইকীয়াক অৰ্পণ কৰা বুলি মুখ্যমন্ত্ৰীয়ে মন্তব্য কৰে।
উল্লেখ্য যে, সাংবিধানিক নিয়ম অনুসৰি যোৱা বুধবাৰে এই পদৰ পৰা পদত্যাগ কৰিছিল দেৱজিৎ শইকীয়াই। ২০২১ চনত মাত্ৰ ৫২ বছৰ বয়সতে অসমৰ কনিষ্ঠতম মহাধিবক্তা হোৱাৰ গৌৰৱ অৰ্জন কৰা শইকীয়াই বিগত সময়ছোৱাত বিভিন্ন গুৰুত্বপূৰ্ণ আইনী বিষয়ত চৰকাৰক প্ৰতিনিধিত্ব কৰিছে। চৰকাৰৰ মুখ্য আইনী উপদেষ্টা হিচাপে তেওঁৰ অভিজ্ঞতাক সন্মান জনাই ২.০ চৰকাৰৰ প্ৰথমখন কেবিনেটতে এই নিযুক্তিৰ মোহৰ মৰা হয়।
আইনী ক্ষেত্ৰখনৰ উপৰি ক্ৰীড়া প্ৰশাসনৰ লগতো ওতঃপ্ৰোতভাৱে জড়িত হৈ আছে দেৱজিৎ শইকীয়া। বৰ্তমান তেওঁ বিচিচিআইৰ মানদণ্ডৰ সচিব হিচাপে কাৰ্যনিৰ্বাহ কৰাৰ লগতে আইচিচি ব’ৰ্ডত ভাৰতীয় ক্ৰিকেট ব’ৰ্ডৰ সঞ্চালক হিচাপেও দায়িত্ব পালন কৰিছে। পূৰ্বে ২০১৭ চনত কাৰ্যবাহী মহাধিবক্তা আৰু অতিৰিক্ত মহাধিবক্তা হিচাপে কাম কৰা শইকীয়াৰ এই নিযুক্তিৰ সিদ্ধান্তক আইনী মহলে আদৰণি জনাইছে।
About the Author
