ষ্টাফ ৰিপোৰ্টাৰ, ২৪ এপ্ৰিলঃ সাম্প্ৰতিক পৰিস্থিতিত পশুপালক সকলৰ সমস্যা সম্পৰ্কত আজি কামৰূপ জিলাৰ সোণাপুৰত উপস্থিত হৈ অসম পশুধন নিগমৰ অধ্যক্ষ মনোজ শইকীয়াই কেইবাজনো পশুপালকৰ লগত মত বিনিময় কৰে। লক ডাউনৰ ফলত উদ্ভৱ হোৱা পৰিস্থিতিৰ পৰিপ্ৰেক্ষিতত ৰাজ্যখনৰ পশুপালক সকলে বিভিন্ন সমস্যাৰ সন্মুখীন হোৱাৰ অভিযোগ পোৱাৰ পাছত পুৱাই গৈ সোণাপুৰ পশু চিকিৎসালয়ত উপস্থিত হৈ পশু চিকিৎসা বিষয়া, চিকিৎসক আদিৰ লগত এক পয্যালোচনা সভাত মিলিত হয় আৰু পশুৰ প্ৰতিষেধক, ঔষধ আৰু পশুখাদ্য আদিৰ সন্দৰ্ভত দীঘলীয়া আলোচনা কৰে। অধ্যক্ষ গৰাকীয়ে বৃহত্তৰ অঞ্চলটোৰ কেইবাজনো প্ৰগতিশীল পশুপালকৰ লগতো পৃথকে পৃথকে আলোচনা কৰে আৰু পশুপালক সকলে সন্মুখীন হোৱা সমস্যা সমাধানৰ বাবে তাৎক্ষণিক ভাৱে বিষয়াসকলক ব্যৱস্থা লবলৈ নিৰ্দেশ দিয়ে। অধ্যক্ষ শইকীয়াই পিছত কেইবাখনো ছাগলী, গাহৰি, হাঁহ-কুকুৰা আৰু দুগ্ধ পাম পৰিৰ্দশণ কৰে আৰু চিকিৎসকসকলক পশুপালক সকলৰ লগত সঘন যোগাযোগ ৰক্ষা কৰিবলৈ কয়। অধ্যক্ষ গৰাকীৰ লগতে বিভাগৰ উপ-সঞ্চালক, জিলা পশুপালন বিষয়া, নিগমৰ পশু চিকিৎসা বিষয়া আৰু কেইবাগৰাকীও পশু চিকিৎসক উপস্থিত থাকে। অধ্যক্ষ গৰাকীৰ এনে পদক্ষেপক স্থানীয় ৰাইজে প্ৰশংসা কৰে।
