কোৰোনা মহামাৰীয়ে সমগ্ৰ দেশ ত্ৰস্ত কৰাৰ সময়তে মুম্বাইৰ এখন চিকিৎসালয়ত সংঘটিত হৈছে এক ভয়ংকৰ ঘটনা। বৃহমুম্বাইৰ ৰজাবাড়ী হাস্পতালৰ আইচিইউ চিকিৎসাধীন হৈ থকা এগৰাকী কোভিড ৰোগীৰ চকু নিগনিয়ে কুটি খোৱাক লৈ সৃষ্টি হৈছে তীব্ৰ চাঞ্চল্যৰ। আৰক্ষীয়ে ঘটনাৰ তদন্ত আৰম্ভ কৰিছে যদিও হাস্পতাল কৰ্তৃপক্ষই দিয়া গা এৰা মন্তব্যক লৈও এতিয়া সৃষ্টি হৈছে প্ৰতিক্ৰিয়াৰ।
জানিবপৰা মতে, মুম্বাইৰ কুৰ্লাৰ কমানী এলেকাৰ নিবাসী ২৪ বৰ্ষীয় শ্ৰীনিৱাস ইলাপ্পা নামৰ যুৱকজনক শ্বাস প্ৰশ্বাসত অসুবিধাজনিত কাৰণত দেওবাৰে ৰজাবাড়ী হাস্পতালত ভৰ্তি কৰা হৈছিল। যুৱকজনৰ স্বাস্থ্যৰ অধিক অৱনতি ঘটাত পৰৱৰ্তী সময়ত তেওঁক আইচিইউৰ ভেণ্টিলেটৰ ৰখা হয়।
কিন্তু মঙলবাৰে পুৱা যেতিয়া ৰোগীজনৰ আত্মীয় তেওঁৰ ওচৰলৈ আহে, তেতিয়া প্ৰত্যক্ষ কৰে যে যুৱকজনৰ এটা চকুৰ পৰা তেজ ওলাই আছে। লগে লগে পৰিয়ালে হাস্পতাল কৰ্তৃপক্ষক অৱগত কৰাত হাস্পতাল কৰ্তৃপক্ষই পৰীক্ষা নীৰিক্ষা কৰাৰ অন্তত এই কথা সদৰি কৰে যে যুৱকজনৰ চকু নিগনিয়ে কুটিছিল।
অৱশ্যে যুৱকজনৰ চকুত নিগনিয়ে সৃষ্টি কৰা ঘাঁৰ পৰা চকুটো ৰক্ষা পৰে যদিও পৰৱৰ্তী সময়ত যুৱকজনৰ মৃত্যু ঘটে। আনফালে যুৱকজন শ্বাস প্ৰশ্বাসৰ অসুবিধাৰ লগতে বৃক্কৰ ৰোগতো আক্ৰান্ত আছিল বুলি হাস্পতাল কৰ্তৃপক্ষই জানিবলৈ দিয়ে।
কিন্তু সমগ্ৰ ঘটনা সন্দৰ্ভত মৃত যুৱকজনৰ পৰিয়ালে সৃষ্টি কৰা উত্তপ্ত পৰিস্থিতিৰ পৰিপ্ৰেক্ষিতত মহানগৰপালিকাই ঘটনাৰ তদন্তৰ নিৰ্দেশ দিয়ে। ইফালে বৰষুণৰ বাবে খিড়িকীৰ ফাঁকেৰে নিগনি আইচিইউৰ ভিতৰত প্ৰৱেশ কৰা বুলি যুক্তি দি হাস্পতালৰ গাফিলতি লুকুৱাবলৈ চেষ্টা কৰা পৰিলক্ষিত হৈছে হাস্পতাল কৰ্তৃৃপক্ষই।
