দেওবাৰে নিশা কাৰ্বি আংলংৰ বোকাজান মহকুমাৰ লাহৰিজান পহৰা চকীৰ সন্মুখত আৰক্ষীৰ নিয়মীয়া তালাচীত বৃহৎ পৰিমাণৰ ড্ৰাগছ জব্দ কৰিবলৈ সক্ষম হয়। ঘটনা সন্দৰ্ভত আৰক্ষীয়ে দুজন লোকক গ্ৰেপ্তাৰ কৰি তদন্ত অব্যাহত ৰাখিছে।
আৰক্ষীয়ে সদৰী কৰা মতে, নিশা আৰক্ষীৰ তালাচীত MN-01AK-4789 নম্বৰৰ বলেৰ’ গাড়ীখনৰ বেক লাইটৰ চেম্বাৰৰ পৰা ৩০টা চাবোনৰ বাকছৰ ভিতৰত ভৰাই অনা ৪১২ গ্ৰাম ওজনৰ হেৰ’ইন জব্দ কৰিবলৈ সক্ষম হয়। আৰক্ষীয়ে ঘটনা সন্দৰ্ভত মণিপুৰৰ আমজাদ আলী আৰু আনিশ খান নামৰ দুই সৰবৰাহকাৰীক গ্ৰেপ্তাৰ কৰিছে। আৰক্ষীৰ প্ৰাথমিক অনুসন্ধানত গাড়ীখন মণিপুৰৰ পৰা গুৱাহাটী যোৱাৰ লক্ষ্য আছিল বুলি জনা গৈছে।
