স্বনামধন্য নাট্যশিল্পী সত্যপ্ৰসাদ বৰুৱাই লিখা “ধৰালৈ যিদিনা নামিব সৰগ” নাটকখন আছিল অল ইণ্ডিয়া ৰেডিঅ’ যোগে প্ৰচাৰ হোৱা প্ৰথম অসমীয়া অনাতাঁৰ নাটক। ১৯৪৮চনৰ ৬ জুলাইত প্ৰচাৰ হৈছিল এই নাটকখন। ১৯১৯ চনৰ ২৯ অক্টোবৰত মিজোৰামৰ আইজলত জন্মগ্ৰহণ কৰা বৰুৱাই ১৯৪৮ চনত অল ইণ্ডিয়া ৰেডিঅ’ত অনুষ্ঠান কাৰ্যবাহী হিচাপে যোগ দি চাকৰি জীৱনৰ পাতনি মেলে।
সত্য প্ৰসাদ বৰুৱাৰ পিতৃ আছিল গুৰু প্ৰসাদ বৰুৱা আৰু মাতৃ পদ্মৰেখা বৰুৱা। ১৯৩৮ চনত কটন কলেজৰ পৰা অৰ্থনীতিত অনাৰ্চসহ স্নাতক ডিগ্ৰী লাভ কৰা সত্য প্ৰসাদ বৰুৱাই ওকালতিৰ শিক্ষা গ্ৰহণ কৰে। ১৯৬৫ চনলৈকে ৰেডিঅ’ত কাম কৰি সেই বছৰতে অসম চৰকাৰ তথ্য আৰু জনসংযোগ বিভাগৰ যুটীয়া সঞ্চালক ৰূপে যোগদান কৰে। ১৯৭০ চনত বিভাগটোৰ সঞ্চালকৰ দায়িত্ব গ্ৰহণ কৰে। ১৯৭২ চনত সাংস্কৃতিক সঞ্চালকালয়ৰ প্ৰতিষ্ঠাপক সঞ্চালকৰূপে দায়িত্ব গ্ৰহণ কৰি ১৯৭৪ চনত চাকৰিৰ পৰা অৱসৰ লয়।
গুৱাহাটীৰ কুমাৰ ভাস্কৰ নাট্য মন্দিৰৰ লগত ওতপ্ৰোতভাৱে জড়িত আছিল সত্য প্ৰসাদ বৰুৱা। অসমীয়া ৰক্ষণশীল সমাজত নাৰীক পুৰুষৰ লগত অভিনয় কৰোৱাৰ ক্ষেত্ৰত বিশেষ ভূমিকা গ্ৰহণ কৰিছিল বৰুৱাই।তদুপৰি সাংবাদিক হিচাপে তেখেতে চাইক্ল’ৰমা নামৰ এটি শিতানত “দ্য আছাম ট্ৰিবিউন” কাকতত ১৯৭৬ চনৰ পৰা মৃত্যুৰ আগলৈকে নাটক সমালোচনা কৰে।
তেখেতে পাঁচশখনতকৈ অধিক অনাতাঁৰ নাটকত অংশগ্ৰহণ কৰিছিল। অসমীয়া নাট্য সাহিত্যৰ ভৰাঁল চহকী কৰাৰ উপৰিও গ্ৰীক, নৰৱেজিয়ান, ইংৰাজী, ৰুছ আদি ভাষাৰ নাটক অসমীয়ালৈ অনুবাদ কৰি নাট্যপ্ৰেমীক উপকৃত কৰিছিল। ১৯৭৮ চনত তেখেতে ইডিপাছ নাটকত কৰা অভিনয়ৰ বাবে সৰ্বভাৰতীয় সমালোচক সংস্থাৰ “শ্ৰেষ্ঠ অভিনেতা বঁটা” লাভ কৰিছিল।
প্ৰায় ছটা দশক ধৰি অসমৰ নাট্য জগতখনৰ সৈতে নিবিড়ভাবে জড়িত অসমৰ আধুনিক নাট্য আন্দোলনৰ পিতৃ স্বৰূপ নাট্যপ্ৰভাকৰ সত্য প্ৰসাদ বৰুৱাৰ ২০০১ চনৰ ২৬ জুনত জীৱন নাটৰ সামৰণি পৰে।
