সমৰ দেৱনাথ, হোজাই:- গ্ৰন্থকাৰ ৰেণুকা দেৱী শাস্ত্ৰীৰ চতুৰ্থখনী গ্ৰন্থ সৰল অসমীয়া ভাষাত অনুদিত “শ্রীমদ্ভগৱদ্ গীতা” উন্মোচন কৰা হয়। হোজাই জিলা সাহিত্য সভাৰ সৌজন্যত হোজাইৰ গৌৰনগৰ সংস্কৃত বেদ্ বিদ্যালয়ত আয়োজন কৰা উন্মোচনী অনুষ্ঠানত মুখ্য অতিথিৰূপে উপস্থিত থাকে ৰবীন্দ্ৰনাথ ঠাকুৰ বিশ্ববিদ্যালয়ৰ উপাচাৰ্য অমলেন্দু চক্ৰবৰ্ত্তী।
হোজাই জিলা সাহিত্য সভাৰ সম্পাদক অনুপ কুমাৰ বৰঠাকুৰে আত ধৰা উন্মোচনী অনুষ্ঠানত সভাৰ হোজাই জিলাৰ সভাপতি ড০ গুনেশ্বৰ শইকীয়া, উপসভাপতি ড০ ইন্দ্ৰজিত বেজবৰুৱা, হোজাই শাখাৰ সভাপতি চামচুক হক, মণিপুৰী সাহিত্য পৰিষদ হোজাই জিলাৰ সভাপতি টি মনিহাৰ সিংহ, নদী আৰু নাৰীৰ কেন্দ্ৰীয় সম্পাদিকা দীপিকা ফুকন, সংস্কৃত বিদ্যালয়ৰ প্ৰতিস্থাপক শিক্ষক তথা ৰেণুকা দেৱীৰ পিতৃ খেলেম্বা সিংহ তথা অনান্য বিশিষ্ট ব্যক্তি সকলে আসন অলংকৃত কৰে।
বিশিষ্ট অতিথি সকলৰ উপস্থিতিত উন্মোচন কৰা
সময়ত অতিথি সকলৰ উপস্থিতিত উন্মোচনীৰ সময়ত আকাশ উপ সমিতিৰ আহ্বায়িকা পদ্মিনী ডাউলাগুফুৱে শিব বন্দনা পাঠ কৰে। সচৰাচৰ সভাসমূহত সংস্কৃতৰ বিভিন্ন বাক্যৰে উদাহৰণ দাঙি ধৰা উপাচাৰ্যই আজিও গীতা তথা অন্যান্য কিতাপৰ সংস্কৃতৰ বিভিন্ন বাক্যৰে উদাহৰণ দাঙি ধৰি উপস্থিত অতিথি সকলক আপ্লুত কৰে।
উল্লেখ্য যে, উদীয়মান লেখিকা ৰেণুকা দেৱী শাস্ত্ৰীৰ এয়া চতুৰ্থ খন গ্ৰন্থ। “মুদ্ধবোধ ব্যাকৰণ” শাস্ত্ৰী উপাধী লাভ কৰা ৰেণুকা দেৱীয়ে অসমীয়াৰ লগতে মণিপুৰী ভাষাতো সাহিত্য চৰ্চা কৰি আহিছে। লেখিকা গৰাকীয়ে পূৰ্বতে মণিপুৰী ভাষাত প্ৰকাশিত “চম্লবী থম্মোয়” (নিৰ্মল হৃদয়), সংস্কৃতৰ পৰা মণিপুৰী ভাষালৈ অনুদিত “শ্রীমদ্ভগৱদ্ গীতা” আৰু অসমীয়া ভাষাত “মহাকবি কালিদাস” প্ৰকাশিত হৈছে। আজি প্ৰকাশিত সংস্কৃতৰ পৰা অসমীয়ালৈ অনুবাদ কৰা “শ্রীমদ্ভগৱদ্ গীতা” তেওঁৰ চতুৰ্থ গ্ৰন্থ।
