ভূমি দখলৰ কামত জড়িত হ’লে বিজেপিৰ নেতাইও ভুগিব লাগিব পৰিণাম। এই মন্তব্য কৰে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই।
সোমবাৰে সাংবাদিকৰ আগত মুখ্যমন্ত্ৰীয়ে কয়, ‘ভূ-মাফিয়াক বিজেপি বা কংগ্ৰেছী বুলি শ্ৰেণীভুক্ত কৰিব নোৱাৰি। তেওঁলোক অপৰাধী। তেওঁ বিজেপিৰ হওক বা কংগ্ৰেছ দলৰ হওক কাকো ৰেহাই দিয়া নহ’ব।”
তেওঁ দাবী কৰে যে আৰক্ষীৰ ব্যৱস্থাৰ বাবে ইতিমধ্যে ভূ-মাফিয়াৰ এটা অংশই অবৈধ উপায়েৰে দখল কৰা মাটি খালী কৰিছে। মাটিৰ প্ৰকৃত মালিকসকলেও নিজৰ সম্পত্তি ঘূৰাই পাইছে। তেওঁ কয়, ‘জিলা উপায়ুক্ত আৰু আৰক্ষীয়ে সমগ্ৰ নেক্সাছটো ধ্বংস কৰিবলৈ প্ৰয়াস কৰি আহিছে।’
গুৱাহাটীৰ আৰক্ষী আয়ুক্ত দিগন্ত বৰাই গুৱাহাটীত এটা সুসংগঠিত ভূমি দখলৰ ৰেকেট উদঙাই দিয়াৰ পিছতে এইদৰে মন্তব্য কৰে মুখ্যমন্ত্ৰী শৰ্মাই।
এই অবৈধ অভিযানৰ ওপৰত দমন চলোৱাৰ ফলত ইতিমধ্যে ভূমি দখলৰ কাণ্ডত জড়িত থকাৰ অভিযোগত বিগত সপ্তাহত কমেও তিনিজন ব্যক্তিক গ্ৰেপ্তাৰ কৰা হৈছে।
ইয়াৰ লগত জড়িতসকলৰ ভিতৰত আছিল বিজেপি অ’বিচি মৰ্চাৰ নেতা পংকজ দাস, যাক পৰৱৰ্তী সময়ত দলীয় পদৰ পৰা অপসাৰণ কৰা হয়।
