দেশত পুনৰবাৰ আতংক বিয়পাবলৈ আৰম্ভ কৰিছে কোভিড মহামাৰীয়ে। স্বাস্থ্য মন্ত্ৰালয়ে প্ৰকাশ কৰা তথ্য অনুসৰি, এদিনতে দেশত কোভিড-১৯ত আক্ৰান্ত হৈছে ৭০২ জনকৈ লোক। এই পৰিসংখ্যাকে ধৰি সমগ্ৰ দেশতে কোৰোনা আক্ৰান্তৰ সংখ্যা ৪০৯৭ লৈ বৃদ্ধি পাইছে। এনে পৰিস্থিতিত স্বাস্থ্য মন্ত্ৰালয়ে ৰাইজক বিশেষভাৱে সতৰ্ক হ’বলৈ আহ্বান জনাইছে।
স্বাস্থ্য মন্ত্ৰালয়ে পুৱা ৮ বজালৈকে প্ৰকাশ কৰা তথ্য অনুসৰি যোৱা ২৪ ঘন্টাত নতুনকৈ ৬ জন ৰোগীৰ মৃত্যু হৈছে। ইয়াৰে মহাৰাষ্ট্ৰত দুজন আৰু কৰ্ণাটক, কেৰালা, পশ্চিম বংগ আৰু দিল্লীত এজনকৈ ৰোগীৰ মৃত্যু হৈছে। দিল্লীত স্বাস্থ্যমন্ত্ৰী সৌৰভ ভৰদ্বাজে অসুস্থ লোকক ভিৰত যোৱাৰ পৰা বিৰত থাকিবলৈ কয়।
ইয়াৰ পূৰ্বে ২২ ডিচেম্বৰত দেশৰ ভিতৰতে সৰ্বাধিক ৭৫২ জন নতুনকৈ কোভিড আক্ৰান্ত পঞ্জীয়ন হৈছিল। যদিও ৫ ডিচেম্বৰৰ ভিতৰত দৈনিক কোভিড আক্ৰান্তৰ সংখ্যা হ্ৰাস পাবলৈ আৰম্ভ কৰিছিল, কিন্তু বৃদ্ধি পোৱা জাৰৰ বাবে নতুন ভেৰিয়েন্টৰ সংক্ৰমণৰ ঘটনা পুনৰ বৃদ্ধি পাইছে।
কোভিডৰ নতুন আতংকৰ মাজতে দিল্লীৰ স্বাস্থ্যমন্ত্ৰী সৌৰভ ভৰদ্বাজে কয় যে তেওঁ পজিটিভ ৰোগীৰ তথ্য লাভ কৰিবলৈ জিন’ম ছিকুৱেন্সিঙৰ নিৰ্দেশ দিছে যাতে JN.1 ৰোগী নিশ্চিত হ’ব পাৰে। দিল্লী চৰকাৰে কয় যে ৰাজধানীত কোভিড টেষ্ট বৃদ্ধি কৰা হৈছে। বুধবাৰে ৬৩৬টা পৰীক্ষা কৰা হৈছে। দিল্লীত খোদ বুধবাৰে JN.1ৰ প্ৰথমজন ৰোগী ধৰা পৰে।
সৌৰভ ভৰদ্বাজে কয় যে কালি তিনিজন ৰোগী ধৰা পৰিছে, ইয়াৰে দুজন পুৰণি অমিক্ৰন ভেৰিয়েণ্টৰ হোৱাৰ বিপৰীতে এজন নতুন JN.1 ভেৰিয়েণ্টৰ। ভাল কথাটো হ’ল নতুন ভেৰিয়েণ্টত আক্ৰান্ত ৰোগীজনক চিকিৎসালয়ত ভৰ্তি কৰা হৈছে। তেওঁ কয় যে এগৰাকী ৫২ বছৰীয়া মহিলা JN.1 ভেৰিয়েণ্টত আক্ৰান্ত হৈছে।
সৌৰভ ভৰদ্বাজে কয় যে এই ভেৰিয়েণ্টটোক লৈ বেছি চিন্তিত হোৱাৰ প্ৰয়োজন নাই। বৰ্তমান চাৰিজন ৰোগী চিকিৎসালয়ত আছে। অৱশ্যে তেওঁ ৰাইজক কয় যে যিসকলে দীৰ্ঘদিন ধৰি অসুস্থ হৈ আছে তেওঁলোকে ভিৰ কৰা ঠাইৰ পৰা আঁতৰি থাকিব লাগে। সৌৰভ ভৰদ্বাজে বাছ ষ্টপেজ আৰু অন্যান্য ৰাজহুৱা স্থানত সজাগতা অভিযান চলাবলৈ নিৰ্দেশ জাৰি কৰিছে।
