ষ্টাফৰিপোৰ্টাৰ, ৪ এপ্ৰিলঃ মহামাৰী কোৰোনাত আতংকিত হৈ প্ৰধানমন্ত্ৰীয়ে জনোৱা ২১ দিনীয়া লক ডাউন আহ্বানলৈ পূৰ্ণ সহযোগিতা আগবঢ়াই গৃহবন্দী হৈ আছে আমগুৰিৰ ভূঞাহাটবাসী ৰাইজ৷ কৃষিপ্ৰধান অঞ্চলটোত বহু ৰাইজৰে চাউলমুঠিৰ যোগাৰ আছে যদিও আন বহুতৰে সেইকণো নাই৷ বিশেষকৈ জাঁজী নৈ পাৰৰ খেতি বাতি হীন দৈনিক হাজিৰা কাম কৰি পৰিয়াল পোহপাল দিয়া দৰিদ্ৰ ৰাইজৰ বাবে দুবেলা দুমুঠি যোগাৰ কৰাতো কষ্টসাধ্য হৈ পৰিছে৷ আজি এইসকল ৰাইজৰ লগতে ভূঞাহাটৰ অতি দৰিদ্ৰ বহুকেইটা পৰিয়ালৰ মাজত খাদ্য সামগ্ৰী বিতৰণ কৰে শিৱসাগৰ লায়নচ ক্লাৱে৷ আমগুৰি চক্ৰ বিষয়া ৰিতুৰাজ বৰদলৈৰ আহ্বানত স্বেচ্ছাসেৱী অনুষ্ঠানটোৰ বিষয়াসকলে ৰাইজৰ মাজত চাউল, দাইল, আলু, নিমখ, মিঠাতেল, আটাকে ধৰি বহুকেইপদ নিত্য প্ৰয়োজনীয় খাদ্য সামগ্ৰী বিতৰণ কৰে৷ স্হানীয় অধ্যাপক প্ৰাঞ্জল প্ৰতিম বড়া আৰু মনোজ জগানি, সুভম আগৰৱালা, সিদ্ধান্ত চাহেৱালা, ড° পংকজ বিহানি, নীৰজ আগৰৱালা, প্ৰদীপ গোৱেল, অংকুশ গোৱেল প্ৰমুখ্যে লাইনচ ক্লাৱৰ বিষয় ববীয়াই আমগুৰি প্ৰশাসনৰ সহযোগত আগবঢ়োৱা এই সেৱাত ষ্হানীয় ৰাইজে শলাগ লৈছে৷ চক্ৰ বিষয়াৰ সহিতেএইসকল ব্যক্তিয়ে পুৱা ভাগত আমগুৰি পৌৰসভাৰ এলেকাৰ জ্যোতি নগৰতো ৰাইজৰ মাজতো খাদ্য সামগ্ৰী বিতৰণ কৰে৷
