গৃহমন্ত্ৰী অমিত শ্বাহক সাক্ষাৎ কৰাৰ এদিন পিছতে পঞ্জাৱৰ প্ৰাক্তন মুখ্যমন্ত্ৰী কেপ্টেইন অমৰিন্দৰ সিঙে বৃহস্পতিবাৰে ৰাষ্ট্ৰীয় নিৰাপত্তা উপদেষ্টা অজিত ডোভালক সাক্ষাৎ কৰে। অমৰিন্দৰ সিঙে ডোভালক এনে এটা সময়ত লগ পাইছিল যেতিয়া পঞ্জাৱত ৰাজনৈতিক সংকট অব্যাহত আছে। দলৰ পঞ্জাৱ গোটৰ সভাপতি নৱজ্যোত সিং সিদ্ধুৱে পদত্যাগ কৰাৰ পিছত কংগ্ৰেছৰ বিবাদ এতিয়া দিল্লী পাইছেগৈ।
অমৰিন্দৰ সিং আৰু অজিত ডোভালৰ মাজত হোৱা বৈঠকখন গুৰুত্বপূৰ্ণ বুলি বিবেচনা কৰা হৈছে। কিয়নো প্ৰাক্তন মুখ্যমন্ত্ৰীয়ে শেহতীয়াকৈ নৱজ্যোত সিং সিদ্ধুক আক্ৰমণ কৰি কৈছিল যে সিদ্ধুৰ ইমৰান খান আৰু পাকিস্তানৰ সেনা প্ৰধান কমৰ বাজৱাৰ সৈতে ঘনিষ্ঠ বন্ধুত্ব আছে আৰু যদি তেওঁক পঞ্জাৱৰ কোনো গুৰুত্বপূৰ্ণ পদত ৰখা হয়, তেন্তে ৰাষ্ট্ৰীয় সুৰক্ষাৰ বাবে ই সঠিক নহ’ব।
স্মৰ্তব্য যে কেপ্টেইন অমৰিন্দৰে বুধবাৰে গৃহমন্ত্ৰী অমিত শ্বাহক লগ কৰিবলৈ ঘৰত উপস্থিত হৈছিল। দুয়োজনে প্ৰায় ৪৫ মিনিটৰ বাবে কথোপকথন কৰিছিল। শ্বাহে অমৰিন্দৰৰ সৈতে বিজেপিত যোগদান কৰাৰ বিষয়ে আলোচনা কৰিছিল বুলি বিশ্বাস কৰা হয়। ইফালে, কিছুমান প্ৰতিবেদনত এইটোও কোৱা হৈছে যে অমৰিন্দৰ সিঙে দিল্লীত কংগ্ৰেছৰ বিদ্ৰোহী জি-২৩ গোটৰ নেতাসকলক সাক্ষাৎ কৰাৰ সম্ভাৱনা আছে।
অমৰিন্দৰ সিঙৰ মিডিয়া উপদেষ্টাই কয় যে প্ৰাক্তন মুখ্যমন্ত্ৰীয়ে অমিত শ্বাহক লগ কৰিছিল আৰু কৃষকসকলৰ বিষয়ত তেওঁৰ সৈতে কথা পাতিছিল। তেওঁ কয় যে দুয়োজন নেতাই কৃষি আইনৰ ওপৰত চলি থকা প্ৰদৰ্শনৰ বিষয়ে আলোচনা কৰিছে। কেপ্টেইন সিঙে শ্বাহৰ পৰা আইন প্ৰত্যাহাৰ আৰু অতি সোনকালে এমএছপি প্ৰৱৰ্তন কৰাৰ দাবী উত্থাপন কৰিছিল। তেওঁ পঞ্জাৱত বিভিন্ন শস্য খেতিৰ ওপৰত গুৰুত্ব আৰোপ কৰিবলৈও আহ্বান জনাইছিল।
