নতুন মাহ ছেপ্টেম্বৰৰ আৰম্ভণিৰ লগে লগে দেশজুৰি কেইবাটাও গুৰুত্বপূৰ্ণ আৰ্থিক আৰু ব্যৱহাৰিক নিয়ম সলনি হৈছে। পেট্ৰ’লিয়াম প্ৰতিষ্ঠানসমূহৰ নতুন মূল্য নিৰ্ধাৰণৰ ফলত ব্যৱসায়ীসকলৰ লগতে সাধাৰণ জনসাধাৰণৰ ওপৰত অতিৰিক্ত বিত্তীয় বোজা পৰিছে। ১ ছেপ্টেম্বৰৰ পৰা কাৰ্যকৰী হোৱা ৭টা প্ৰধান পৰিৱৰ্তন হৈছে- কমাৰ্চিয়েল এলপিজি চিলিণ্ডাৰৰ মূল্য বৃদ্ধি: ১৯ কেজি ওজনৰ ব্যৱসায়িক (কমাৰ্চিয়েল) এলপিজি চিলিণ্ডাৰৰ মূল্য প্ৰতি চিলিণ্ডাৰত ৯.৫০ টকাৰ পৰা ১১.৫০ টকালৈ বৃদ্ধি কৰা হৈছে। ইয়াৰ ফলত হোটেল, ৰেষ্টুৰেণ্ট আৰু কেটাৰিং ব্যৱসায়ত খৰচ বৃদ্ধি পাব। বিমানৰ ইন্ধনৰ মূল্য বৃদ্ধি: বিমানৰ ইন্ধন বা এভিয়েশ্যন টাৰ্বাইন ফুৱেলৰ মূল্য ৫.৪৬% লৈ বৃদ্ধি পাইছে।
ইয়াৰ ফলত অনাগত দিনত বিমানৰ টিকটৰ দাম বৃদ্ধি পোৱাৰ পূৰ্ণ সম্ভাৱনা আছে। চিএনজি আৰু পিএনজিৰ দাম বৃদ্ধি: ইন্ধনৰ আন্তঃৰাষ্ট্ৰীয় বজাৰত মূল্যবৃদ্ধিৰ প্ৰভাৱত দেশৰ কেইবাখনো ডাঙৰ চহৰত চিএনজি আৰু ঘৰুৱা পিএনজি গেছৰ দাম বৃদ্ধি কৰা হৈছে। গাখীৰৰ পাইকাৰী মূল্য বৃদ্ধি: গো-খাদ্য আৰু পৰিবহণ খৰচ বৃদ্ধি পোৱাৰ বাবে ১ ছেপ্টেম্বৰৰ পৰা গাখীৰৰ পাইকাৰী দামো বৃদ্ধি পাইছে। নতুন বাহনৰ মূল্য বৃদ্ধি: টাটা মটৰ্ছ আৰু হিউণ্ডাইৰ দৰে মুখ্য বাহন নিৰ্মাতা প্ৰতিষ্ঠানসমূহে তেওঁলোকৰ নির্দিষ্ট গাড়ীৰ মডেলসমূহত মূল্যবৃদ্ধি কাৰ্যকৰী কৰিছে।
এলপিজি ই-কেৱাইচিৰ নিয়ম: ৰান্ধনি গেছ চিলিণ্ডাৰৰ ৰাজসাহায্য লাভৰ বাবে ই-কেৱাইচি প্ৰক্ৰিয়া সম্পূৰ্ণ কৰাতো জৰুৰী কৰা হৈছে, নহ’লে ৰাজসাহায্য লাভত পলম হ’ব পাৰে। বিমানবন্দৰৰ নিয়ম সহজ কৰা: ইমিগ্ৰেশ্যন প্ৰক্ৰিয়াৰ সময়ত ব’ৰ্ডিং পাছত ছীল/ষ্টেম্প মৰাৰ নিয়ম বন্ধ কৰা হৈছে, যাৰ ফলত যাত্ৰীসকলে মোবাইল বা প্ৰিণ্ট কৰা ডিজিটেল ব’ৰ্ডিং পাছ দেখুৱাই সহজতে যাত্ৰা কৰিব পাৰিব।
About the Author
