মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে যোৱা ১০ অক্টোবৰত যন্তৰ মন্তৰত আয়োজিত প্ৰতিবাদ দমন কৰিবলৈ দিল্লীত ইণ্টাৰনেট সেৱা কৰ্তন কৰা কাৰ্যত উচ্চতম ন্যায়ালয়ৰ ওচৰত নিঃচৰ্ত ক্ষমা বিচাৰিবলগীয়া হ’ল কেন্দ্ৰীয় চৰকাৰে। শীৰ্ষ আদালতত দাখিল কৰা এক শপতনামাত কেন্দ্ৰীয় গৃহ সচিব গোবিন্দ মোহনে প্ৰকাশ কৰে যে আইন-শৃংখলা ৰক্ষা কৰা আৰু উৰাবাতৰি ৰোধ কৰাৰ লক্ষ্যৰেই প্ৰশাসনে এই জৰুৰী পদক্ষেপ ল’বলৈ বাধ্য হৈছিল।
যন্তৰ মন্তৰত ককৰোচ জনতা পাৰ্টীয়ে আহ্বান জনোৱা প্ৰতিবাদী কাৰ্যসূচীক কেন্দ্ৰ কৰি ৰাজধানীত সৃষ্টি হোৱা অচলাৱস্থাক লৈ দাখিল কৰা দুখন আবেদনৰ শুনানি গ্ৰহণ কৰে ন্যায়াধীশ জয়মাল্য বাগচী আৰু ন্যায়াধীশ ভি মোহনাৰ বিচাৰপীঠে। আবেদনকাৰীৰ হৈ জ্যেষ্ঠ অধিবক্তা কপিল চিব্বল, মেনকা গুৰুস্বামী, গোপাল শংকৰনাৰায়ণনকে ধৰি বহুকেইজন অধিবক্তাই আদালতত যুক্তি প্ৰদৰ্শন কৰে। ইফালে চৰকাৰ আৰু দিল্লী আৰক্ষীৰ পক্ষ লৈ ছলিচিটৰ জেনেৰেল তুষাৰ মেহতাই আদালতক বুজাবলৈ চেষ্টা কৰে যে পৰিস্থিতি নিয়ন্ত্ৰণৰ বাবেই প্ৰশাসনিক বাধা আৰোপ কৰা হৈছিল।
ইফালে, ৰাজধানীৰ যোগাযোগ ব্যৱস্থা স্তব্ধ কৰাৰ অভিযোগ সন্দৰ্ভত দিল্লী মেট্ৰ’ ৰে’ল কৰ্প’ৰেশ্যনে আদালতত নিজৰ স্থিতি স্পষ্ট কৰে। ডিএমআৰচিয়ে জানিবলৈ দিয়া মতে, মেট্ৰ’ সেৱা সম্পূৰ্ণৰূপে বন্ধ কৰা হোৱা নাছিল, কেৱল সুৰক্ষাৰ স্বাৰ্থত ৪৫টা নিৰ্দিষ্ট ষ্টেচনতহে যাত্ৰীৰ চলাচল সীমিত কৰা হৈছিল।
উল্লেখ্য যে, ৯ অক্টোবৰত দিয়া পূৰ্বৰ নিৰ্দেশনাত উচ্চতম ন্যায়ালয়ে স্পষ্ট কৰি দিছিল যে প্ৰতিবাদৰ অজুহাতত মেট্ৰ’ সেৱা, ৰে’ল চলাচল নাইবা ইণ্টাৰনেট সেৱা বন্ধ কৰি নাগৰিকৰ মৌলিক অধিকাৰ খৰ্ব কৰিব নোৱাৰিব। সেই সময়ত মুখ্য ন্যায়াধীশ সূৰ্য কান্তই চৰকাৰক কঠোৰ ভাষাৰে সকীয়াই দি মন্তব্য কৰিছিল, “আপোনালোকে পৰিস্থিতি নিয়ন্ত্ৰণ কৰিবলৈ কেৱল প্ৰয়োজনীয় পদক্ষেপহে লওক। কিন্তু তাৰ অৰ্থ এইটো নহয় যে মাখি এটা মাৰিবলৈ হাতুৰী ব্যৱহাৰ কৰিব লাগিব।”
আদালতৰ এই সকীয়নি সত্ত্বেও ১০ অক্টোবৰত আৰক্ষীৰ অনুমতি নথকাৰ অজুহাতত দিল্লীজুৰি ব্যাপক প্ৰতিবন্ধকতা সৃষ্টি কৰা হয়। ককৰোচ জনতা পাৰ্টীৰ শীৰ্ষ নেতৃত্ব অভিজিৎ দীপকে, সৌৰভ দাস আৰু আশুতোষ ৰাংকাক বিমানৰ পৰাই আটক কৰাৰ লগতে অৰবিন্দ কেজৰিৱাল আৰু মমতা বেনাৰ্জীৰ দৰে প্ৰাক্তন মুখ্যমন্ত্ৰীসহ প্ৰায় সাত হাজাৰ প্ৰতিবাদকাৰীক জিম্মাত লয় আৰক্ষীয়ে। আদালতৰ নিৰ্দেশ অৱমাননা কৰি ইণ্টাৰনেট বন্ধ কৰা কাৰ্যত শীৰ্ষ আদালতে চৰকাৰৰ বিৰুদ্ধে তীব্ৰ অসন্তুষ্টি ব্যক্ত কৰাৰ পিছতেই অৱশেষত নিঃচৰ্ত ক্ষমা বিচাৰিবলৈ বাধ্য হয় কেন্দ্ৰীয় প্ৰশাসন।
About the Author
