নগাঁও জিলাৰ বটদ্ৰৱাৰ বৰভেটিত আজি পুৱাই পুখুৰীত উপঙি থকা অৱস্থাত উদ্ধাৰ হৈ এগৰাকী যুৱতীৰ মৃতদেহ। জানিব পৰা মতে, গাঁওখনৰ ফকৰ উদ্দিনৰ জীয়াৰী কন্যা জয়গন নেছা নামৰ যুৱতীগৰাকী যোৱা ২৯ জুনৰ পৰা সন্ধানহীন হৈ আছিল। কিন্তু আজি পুৱতি নিশা যুৱতীগৰাকীৰ মৃতদেহ ঘৰৰ কাষৰ পুখুৰী এটাত উপঙি থকা অৱস্থাত স্থানীয় লোকে প্ৰত্যক্ষ কৰে। তাৰ পিছতে আৰক্ষীক খবৰ দিয়াত ঘটনাস্থলীত বটদ্ৰৱা আৰক্ষী উপস্থিত হৈ মৃতদেহটো উদ্ধাৰ কৰি মৰোণত্তৰ পৰীক্ষাৰ বাবে প্ৰেৰণ কৰে।
স্থানীয় লোকে এয়া এক হত্যাকাণ্ড বুলি সন্দেহ কৰিছে। জানিব পৰা মতে, এবছৰ পূৰ্বে আমলখি গাঁৱৰ ইনামুল হক নামৰ ব্যক্তিজনৰ সৈতে বিবাহ পাশত আৱদ্ধ হৈছিল জয়গন নেছা। কিন্তু বিয়াৰ পিছত স্বামীৰ সৈতে ঘটা মনোমালিন্যৰ পৰিণতিত যুৱতীগৰাকীয়ে পিতৃ গৃহলৈ গুছি আহে। স্বামী গৃহৰ পৰিয়ালেই যুৱতীগৰাকীক হত্যা কৰি আত্মহত্যাৰ ৰূপ দিবলৈ চেষ্টা কৰা বুলি অভিযোগ উত্থাপন হৈছে। আৰক্ষীয়ে ঘটনা সন্দৰ্ভত তদন্ত আৰম্ভ কৰিছে যদিও বৰ্তমানেও এয়া এক হত্যা নে আত্মহত্যা সেয়া স্পষ্ট কৰা নাই।
