আলফা স্বাধীনত যোগ দিয়াৰ বাবে ম্যানমাৰলৈ ৰাওনা হোৱা এটা ৭জনীয়া যুৱকৰ দলক বুধবাৰে সোণাৰি নগৰৰ বানফেৰাৰ সমীপত আটক কৰে আৰক্ষীয়ে। আৰক্ষীয়ে জানিবলৈ দিয়া মতে, এখন বাহনেৰে গৈ থকা অৱস্থাত এক গোপন খবৰৰ ভিত্তিত চৰাইদেউ আৰক্ষী আৰু আছাম ৰাইফলছৰ যুটীয়া অভিযান চলাই যুৱক কেইজনক আটক কৰে।
আটকাধীন যুৱক কেইজনৰ পৰিচয় ক্ৰমে নগাঁৱৰ সমৰজ্যোতি লহকৰ আৰু বিকি ৰাজখোৱা আৰু শিৱসাগৰৰ ভাস্কৰ গগৈ, পংকজ গগৈ, প্ৰফুল্ল ফুকন, মনোৰঞ্জন দুৱৰা, বিতুল বৰুৱা বুলি জানিব পৰা গৈছে।
ইফালে আৰক্ষীয়ে সদৰী কৰা মতে, ধৃত সমৰজ্যোতি লহকৰ হৈছে ২০১৬ চনৰ আত্মসমৰ্পণকাৰী আলফা নেতা। তেওঁৰ নেতৃত্বতেই এই যু্ৱককেইজনে আলফা স্বাধীনত যোগদান কৰিবলৈ আহিছিল। আটাইকেইজন যুৱকক অধিক তথ্যৰ বাবে সোণাৰি আৰক্ষী থানাত সোধা-পোছা অব্যাহত ৰাখিছে আৰক্ষীয়ে।
