মঙলবাৰে পুৱা শিৱসাগৰ জিলাৰ দিখৌ নদীৰ ওপৰেৰে এখন দলঙৰ সমীপত এখন নৈশ সেৱা বাছ পথৰ ওপৰত বাগৰি পৰাত কমেও দহজন লোক আহত হয় বুলি আৰক্ষীয়ে জানিবলৈ দিয়ে।
এ এছ ০১ এম চি ০৯১৭ নম্বৰৰ বাছখন গুৱাহাটীৰ পৰা তিনিচুকীয়া অভিমুখে গৈ থকা অৱস্থাত পথৰ পৰা বাগৰি পৰে বুলি আৰক্ষী বিষয়া এজনে জানিবলৈ দিয়ে।
দুৰ্ঘটনাৰ পিছতে আৰক্ষীৰ এটা দলে সেই স্থানত উপস্থিত হৈ স্থানীয় লোকৰ সহযোগত আহত যাত্ৰীসকলক উদ্ধাৰ কৰে।
আহত কেইজন হৈছে উদেষ্ণ ভৰালী (২১), ৰাজশ্ৰী কলিতা (২৪), ৰেশমা বেগম (২৩), বন্দিতা শইকীয়া (২৪), পল্লৱী খনিকৰ (২৪), নীলু ভৰালী (৫০), অন্তৰা হাজৰিকা (২৬), শ্বাহিদুৰ আলী (২৫)। তেওঁলোকক শিৱসাগৰ অসামৰিক চিকিৎসালয়ত ভৰ্তি কৰোৱা হৈছে।
দুৰ্ঘটনাৰ আঁৰৰ কাৰণ এতিয়াও জানিব পৰা হোৱা নাই বুলি আৰক্ষী বিষয়াগৰাকীয়ে জানিবলৈ দিয়ে। আৰক্ষীয়ে সন্দেহ কৰিছে চালকজন মদ্যপান কৰি গাড়ী চলোৱাৰ বাবেই এই দুৰ্ঘটনা সংঘটিত হয়।
