মহাৰাষ্ট্ৰৰ পালঘৰ জিলাত এখন স্থানীয় ৰে’লৰ খুন্দাত পশ্চিম ৰে’লৱেৰ তিনিজন কৰ্মচাৰীৰ মৃত্যু ঘটাৰ ঘটনাই শোকৰ ছাঁ পেলাইছে। তথ্য অনুসৰি ঘটনাৰ সময়ত কৰ্মচাৰী কেইজনে সংকেত প্ৰদানৰ সমস্যা সমাধান কৰি আছিল। চৰকাৰী ৰে’ল আৰক্ষীৰ এগৰাকী বিষয়াই জনোৱা মতে সোমবাৰে নিশা ৮.৫৫ বজাত ভাছাই ৰোড আৰু নৈগাঁও ষ্টেচনৰ মাজত সংঘটিত হয় এই ঘটনা। স্থানীয় ৰেলখন চাৰ্চগেটৰ ফালে গৈ আছিল।
নিহত কৰ্মচাৰী কেইজনক মুখ্য সংকেত পৰিদৰ্শক (ভয়ান্দৰ) বসু মিত্ৰ, বৈদ্যুতিক সংকেত ৰক্ষণাবেক্ষণকাৰী (ভাছাই পথ) সোমনাথ উত্তম লম্বুত্ৰে আৰু সহায়ক শচীন ৱানখেড়ে বুলি চিনাক্ত কৰা হৈছে। বিষয়াগৰাকীয়ে আৰু জনাইছে যে এই আটাইকেইজন কৰ্মচাৰী পশ্চিম ৰে’লৱেৰ মুম্বাই সংমণ্ডলৰ চিগনেলিং বিভাগত নিয়োজিত আছিল। সোমবাৰে সন্ধিয়া বিকল হোৱা কিছুমান চিগনেলিং পইণ্ট মেৰামতি কৰিবলৈ গৈছিল বুলি বিষয়াগৰাকীয়ে জনায়।
বিষয়াসকলে জনোৱা মতে, পশ্চিম ৰে’লৱেয়ে এই সন্দৰ্ভত তদন্তৰ নিৰ্দেশ দিছে। মৃত তিনিজনৰ পৰিয়ালৰ সদস্যক তাৎক্ষণিক সকাহ হিচাপে কৰ্তৃপক্ষই ৫৫ হাজাৰ টকাকৈ প্ৰদান কৰা হৈছে বুলিও ৰে’ল বিভাগে জানিবলৈ দিয়ে।
