গুৱাহাটীঃ ৰাজ্যত মানুহ-হাতী সংঘাত অব্যাহত থকাৰ সময়তে মৰিগাঁৱত মৃত অৱস্থাত উদ্ধাৰ হৈছে আন এটা হাতী।
বন বিভাগৰ বিষয়াসকলে জনোৱা মতে, ধাননি পথাৰত বিদ্যুৎস্পৃষ্ট হৈ হাতীটোৰ মৃত্যু হয়।
ধৰমতুলৰ দপনিবড়ী অঞ্চলৰ সমীপত সংঘটিত হৈছে এই ঘটনা।
বিদ্যুতৰ তাঁৰৰ সংস্পৰ্শলৈ অহাত বিদ্যুৎস্পৃষ্ট হৈ পৰে হাতীটো। হাতী বা জীৱ-জন্তুক পথাৰৰ পৰা আঁতৰাই ৰাখিবলৈ হয়তো তাঁৰ স্থাপন কৰা হৈছে।
মৃত হাতীটোক স্থানীয় ৰাইজে প্ৰত্যক্ষ কৰি লগে লগে বন বিভাগক খবৰ দিয়ে।
বিষয়াসকলৰ মতে, হাতীটোৰ বয়স প্ৰায় ৩৫ বছৰ আৰু খাদ্যৰ সন্ধানত অঞ্চলটোলৈ আহিছিল।
এই সন্দৰ্ভত বন বিভাগে তদন্ত আৰম্ভ কৰিছে।
