বিদ্যালয় ছুটীৰ পিছত অটোৰে ঘৰলৈ আহি থকাৰ সময়ত তীব্ৰবেগী ট্ৰাকৰ খুন্দাত প্ৰাণ হেৰুৱালে ৭টা কণমানি শিশুৱে।
এই হৃদয়বিদাৰক দুৰ্ঘটনা বৃহস্পতিবাৰে বিয়লি সংঘটিত হয় ছত্তীশগড়ৰ কাংকেৰৰ ভানুপ্ৰতাৰৰ কোৰেৰৰ সমীপত।
ছাত্ৰ-ছাত্ৰী কেইগৰাকী আহি থকা অটোখনত বিপৰীত দিশৰ পৰা অহা ট্ৰাকে খুন্দা মৰাত দুৰ্ঘটনাত থিতাতে প্ৰাণ হেৰুৱায় ৭টা শিশুৱে।
ইফালে এই দুৰ্ঘটনাত আন এটা শিশু গুৰুতৰভাৱে আহত হৈছে।
জানিব পৰা মতে, বিদ্যালয় ছুটীৰ পিছত বিয়লি প্ৰায় ৩ বজাত ৮টা শিশুৱে সদায়ৰ দৰে অটোৰে ঘৰলৈ উভতিছিল।
ট্ৰাকৰ খুন্দাত বহু দূৰৈত চিটিকি পৰে অটোখন।
পিছত ঘটনাস্থলীত আৰক্ষী উপস্থিত হৈ স্থানীয় লোকৰ সহযোগত আহত শিশুটিক প্ৰাথমিক চিকিৎসাৰ বাবে ধনলীকানহাৰ সামূহিক স্বাস্থ্য কেন্দ্ৰলৈ প্ৰেৰণ কৰে।
তাৰ পৰা শিশুটিক উন্নত চিকিৎসাৰ বাবে জিলা চিকিৎসালয়লৈ প্ৰেৰণ কৰা বুলি জানিব পৰা গৈছে।
