আবকাৰী দুৰ্নীতিৰ গোচৰত পুনৰ অৰবিন্দ কেজৰিৱালক চমন জাৰি কৰিছে ইডিয়ে। ১৮ জানুৱাৰীত হাজিৰ হ’বলৈ নিৰ্দেশ দিয়া হৈছে।
এই গোচৰত ৩ জানুৱাৰীত দিল্লীৰ মুখ্যমন্ত্ৰীক চমন জাৰি কৰা হৈছিল। কিন্তু কেজৰিৱালে ইয়াৰ কোনো সঁহাৰি দিয়া নাছিল। চমন ‘অবৈধ’ বুলি দাবী কৰি তেওঁ হাজিৰ হোৱাৰ পৰা আঁতৰি থাকে। আম আদমী পাৰ্টিয়ে স্পষ্ট কৰি দিছিল যে কেৱল তেওঁক গ্ৰেপ্তাৰ কৰাৰ উদ্দেশ্যে বাৰে বাৰে চমন জাৰি কৰা হৈছে। আৰু সেইবাবেই তেওঁ উপস্থিত নাছিল।
প্ৰসংগক্ৰমে ইতিমধ্যে ইডিয়ে দিল্লী আবকাৰী দুৰ্নীতিৰ গোচৰত দিল্লীৰ প্ৰাক্তন উপ-মুখ্যমন্ত্ৰী মনীষ ছিছ’দিয়া আৰু সাংসদ সঞ্জয় সিঙক গ্ৰেপ্তাৰ কৰিছে। আন এজন মন্ত্ৰী ৰাজকুমাৰ আনন্দৰ ঘৰত তালাচী চলোৱা হৈছে। ইণ্ডিয়া মিত্ৰজোঁটৰ কাৰ্যকলাপৰ মাজতে কেজৰিৱালক বাৰে বাৰে চমন জাৰি কৰাৰ ফলত আপৰ ভিতৰত উত্তাল হৈ পৰিছে। ইতিমধ্যে দলৰ নেতা আতিছি মাৰ্লেনাই গ্ৰেপ্তাৰৰ আশংকা প্ৰকাশ কৰিছে। আন এজন আপ নেতা ৰাঘৱ চাদ্দাইও কয় যে বিজেপিয়ে কেজৰিৱালক গ্ৰেপ্তাৰ কৰাৰ “পৰিকল্পনা” কৰিছে। সেই পৰিৱেশত শনিবাৰে পুনৰ কেজৰিৱালৰ ওচৰ পালে ইডিৰ চমন। ফলত আপ শিবিৰত তেওঁৰ গ্ৰেপ্তাৰক লৈ শংকা বাঢ়িছে।
ইফালে গেৰুৱা শিবিৰে চমনৰ কোনো সঁহাৰি নিদিয়াৰ বাবে কেজৰিৱালৰ বিৰুদ্ধে সৰৱ হৈ পৰিছে। গেৰুৱা শিবিৰৰ মুখপাত্ৰ শ্বেহজাদ পুনাৱালাই কয় যে দিল্লীৰ মুখ্যমন্ত্ৰীয়ে নিশ্চয় এই গোচৰত কিবা এটা লুকুৱাবলৈ চেষ্টা কৰিছে। সেইবাবেই তেওঁ বাৰে বাৰে উপস্থিত থকাৰ পৰা বিৰত থাকে।
মন কৰিবলগীয়া যে ২ নৱেম্বৰ আৰু ২১ ডিচেম্বৰত ইডিৰ চমনৰ কোনো উত্তৰ দিয়া নাছিল কেজৰিৱালে। ইয়াৰ পিছত ২২ ডিচেম্বৰত পুনৰ তেওঁক এখন জাননী প্ৰেৰণ কৰা হয়। একেদৰে যোৱা ৩ জানুৱাৰীত আম আদমি পাৰ্টিৰ চুপ্ৰেমো হাজিৰ হোৱাৰ কথা আছিল। কিন্তু তেওঁ এৰাই চলিছিল। এইবাৰ ১৮ জানুৱাৰীত ৰাজনৈতিক মহলে তেওঁ কি পদক্ষেপ গ্ৰহণ কৰে তাক লৈ চাঞ্চল্যৰ সৃষ্টি কৰিছে।
