কংগ্ৰেছ নেতা ৰাহুল গান্ধীয়ে একেৰাহে দ্বিতীয় দিনটোৰ বাবে মঙলবাৰে অমৃতসৰৰ সোণালী মন্দিৰ পৰিদৰ্শন কৰি লংগাৰ নামেৰে পৰিচিত সামূহিক পাকঘৰত ‘সেৱা’ আগবঢ়ায়। সোমবাৰেও ৰাহুল গান্ধীয়ে শিখসকলৰ আটাইতকৈ পূজনীয় পূজাস্থলী সোণালী মন্দিৰত প্ৰণিপাত জনাই ‘সেৱা’ আগবঢ়াইছিল।
সেৱাৰ অংশ হিচাপে কংগ্ৰেছ নেতাগৰাকীয়ে সোণালী মন্দিৰত বাচন-বৰ্তন আৰু অন্যান্য কাম কৰি থকা দেখা গৈছিল। পঞ্জাৱ কংগ্ৰেছৰ সভাপতি ৰাজা ৱাৰিঙে সোমবাৰে কৈছিল যে ৰাহুল গান্ধী তেওঁৰ ব্যক্তিগত, আধ্যাত্মিক ভ্ৰমণত আছে।
গুৰুত্বপূৰ্ণ লোকসভা নিৰ্বাচনৰ পূৰ্বে ৰাহুল গান্ধীৰ পঞ্জাৱ ভ্ৰমণক লৈ সৃষ্টি হৈছে জল্পনা কল্পনাৰ। কংগ্ৰেছ দলে ২০২২ চনত আম আদমী পাৰ্টিৰ হাতত ৰাজ্যখনত ক্ষমতা হেৰুৱাইছিল।
