নলবাৰী ষ্টেচনত তহলদাৰী আৰপিএফে অভিযান চলাই সৰবৰাহকাৰীৰ কবলৰ পৰা দুগৰাকী যুৱতীক উদ্ধাৰ কৰিবলৈ সক্ষম হয়। মানৱ সৰবৰাহৰে জড়িত এগৰাকী মহিলা আৰু এজন যুৱককো আটক কৰে আৰপিএফে।
জানিব পৰা মতে, কেৰেলাৰ কোম্পানীত চাকৰি দিয়াৰ প্ৰলোভনৰে যুৱতী দুগৰাকীক গুৱাহাটী-তাম্বুৰাম এক্সপ্ৰেছৰে সৰবৰাহ কৰি থকাৰ সময়তে আৰপিএফৰ তহলদাৰী বাহিনীয়ে অভিযান চলাই যুৱতী দুগৰাকীক উদ্ধাৰ কৰিবলৈ সক্ষম হয়।
উদ্ধাৰ হোৱা যুৱতী দুগৰাকীৰ ঘৰ দৰং জিলাৰ দলগাৱঁত বুলি জানিব পৰা গৈছে। আনহাতে ধৃত মানৱ সৰবৰাহৰে জড়িত যুৱকজনৰ পৰিচয় ঝাৰখণ্ডৰ পুপাকুৰৰ আচগৰ আনচাৰী আৰু মহিলাগৰাকীৰ ঘৰ দৰং জিলাৰ বেচিমাৰীত বুলি জানিব পৰা গৈছে। নলবাৰী ষ্টেচন আৰপিএফে অভিযুক্ত দুজনৰ লগতে যুৱতী দুগৰাকীক পিছত ৰঙিয়াৰ জিআৰপি থানাত চমজাই দিয়ে।
