শুকুৰবাৰে ধুবুৰী জিলাৰ মাঝেৰচাৰ অঞ্চলৰ ওচৰৰ ব্ৰহ্মপুত্ৰ নদীত আৰক্ষীৰ সৈতে হোৱা সংঘৰ্ষত দুজন অভিযুক্ত গৰু চোৰাং ব্যৱসায়ী গুলীত আঘাতপ্ৰাপ্ত হয়। আহতসকলক ধুবুৰী অসামৰিক চিকিৎসালয়ত ভৰ্তি কৰোৱা হৈছে।
সংবাদ মাধ্যমৰ সৈতে বাৰ্তালাপ কৰি ধুবুৰীৰ আৰক্ষী অধীক্ষক অভিজিত গুৰাভে জানিবলৈ দিয়ে যে ধুবুৰী আৰক্ষীয়ে এক খবৰ লাভ কৰিছিল যে ব্ৰহ্মপুত্ৰৰ জৰিয়তে আন্তঃৰাষ্ট্ৰীয় সীমান্ত অতিক্ৰম কৰি নাৱেৰে গৰু সৰবৰাহ কৰা হৈছে। সেই অনুসৰি, এম্বুছ পাৰ্টিয়ে গৰুৰে ভৰ্তি এখন নাও চিনাক্ত কৰে।
গুৰাভে কয়, “যেতিয়া আৰক্ষী দলে নাওখন ৰখাবলৈ ইংগিত দিছিল, অভিযুক্ত চোৰাং ব্যৱসায়ীসকলে ৰোৱাৰ পৰিৱৰ্তে আৰক্ষীৰ নাওখনত জোৰেৰে খুন্দা মাৰিছিল আৰু ক্ষতিগ্ৰস্ত কৰিছিল।” তেওঁ লগতে কয়, “নিজকে বচাবলৈ, আত্মৰক্ষাৰ বাবে আমি ১৩ ৰাউণ্ড গুলী চালনা কৰিব লগা হৈছিল কিন্তু চোৰাং ব্যৱসায়ীসকল নিকটতম মাঝেৰচাৰ অঞ্চললৈ পলাই যায়।” অভিযানটোত আঠটা গৰু জব্দ কৰা হয়।
