অসম চৰকাৰে ২০২২ চনৰ উচ্চতৰ মাধ্যমিক পৰীক্ষাত প্ৰথম বিভাগ লাভ কৰা ২০,৭৪৮ গৰাকী ছাত্ৰী আৰু ৭৫ শতাংশ আৰু তাতকৈ অধিক নম্বৰ লাভ কৰা ৬,০৫২ গৰাকী ছাত্ৰক স্কুটী বিতৰণৰ সিদ্ধান্ত গ্ৰহণ কৰিছে।
এই আঁচনিৰ বাবে ব্যয় কৰিবলগীয়া মুঠ ব্যয়ৰ পৰিমাণ হ’ব ২৫৮.৯ কোটি টকা।
বুধবাৰে অনুষ্ঠিত সাপ্তাহিক কেবিনেট বৈঠকৰ পিছত সংবাদ মাধ্যমক অৱগত কৰি এই কথা ঘোষণা কৰে কেবিনেট মন্ত্ৰী জয়ন্ত মল্ল বৰুৱাই।
এই বৈঠকৰ সময়ত আন কেইবাটাও গুৰুত্বপূৰ্ণ সিদ্ধান্তও গ্ৰহণ কৰা হয়।
সেইবোৰ হ’ল-
- উচ্চ শিক্ষা বিভাগে ন’ডেল প্ৰিন্সিপালৰ জৰিয়তে হিতাধিকাৰীসকলক পঞ্জীয়ন আৰু বীমাৰ বাবে আৰ্থিক সাহায্য প্ৰদান কৰিব।
- প্ৰাদেশিক মহাবিদ্যালয়সমূহত ফিক্সড পেত কৰ্মৰত সহকাৰী অধ্যাপকৰ মাহিলী পাৰিতোষিক ৫৫ হাজাৰ ফিক্সড পেলৈ বৃদ্ধি কৰা হৈছে।
- সমভূমিত পাহাৰীয়া জনজাতি আৰু পাহাৰত সমতল জনজাতিৰ প্ৰমাণ পত্ৰ প্ৰদানৰ বাবে মানক পদ্ধতিৰ ওপৰত নিৰ্দেশনা জাৰি কৰা হৈছে
- মিছন ভূমিপুত্ৰৰ অধীনত অনুসূচিত জাতি, অনুসূচীত জনজাতি, অন্যান্য পিছপৰা শ্ৰেণী আৰু এম অ’ বি চিৰ প্ৰমাণ পত্ৰৰ দৰে উপ-আয়ুক্তসকলে অনলাইনযোগে যোগ্য ব্যক্তিসকলক জাতিৰ প্ৰমাণ পত্ৰ প্ৰদান কৰিব, যাতে তেওঁলোকে ৰাজ্য চৰকাৰৰ অৰ্থনৈতিক, শৈক্ষিক আৰু নিয়োগৰ সুবিধা লাভ কৰাত সহায় কৰে।
- পৰ্যটন বৃদ্ধিৰ প্ৰয়াসত হায়াট গ্ৰুপ অৱ হোটেলে কাজিৰঙাত এখন হোটেল গঢ়ি তুলিব।
