কোকৰাঝাৰ জিলাত এজন আৰক্ষী বিষয়াৰ চাৰ্ভিচ গান কাঢ়ি নিবলৈ চেষ্টা কৰাৰ সময়তে আৰক্ষীৰ গুলীচালনাত আহত হয় এজন সন্দেহযুক্ত চোৰ।
ঘটনাৰ পিছতে লোকজনক চিকিৎসালয়ত ভৰ্তি কৰোৱা হয়। তেওঁৰ ভৰিত গুলী লাগিছিল।
আৰক্ষীৰ মতে, মঙলবাৰে নিশা অভিযুক্তক এটা কাঢ়ি নিয়া বেগ উদ্ধাৰৰ বাবে জিলাখনৰ বালাজান তিনিআলিলৈ লৈ যোৱা হয়।
“উভটি অহাৰ সময়ত তেওঁ এজন বিষয়াৰ পিষ্টল কাঢ়ি নিবলৈ চেষ্টা কৰি পলাই গ’ল। যদিও তেওঁক ৰখাবলৈ কোৱা হৈছিল, তথাপিও তেওঁ গুৰুত্ব নিদিলে। কোনো বিকল্প নোহোৱাত আৰক্ষীৰ দলে এটা গুলী চলাই তেওঁৰ ভৰিত আঘাত কৰে।” আৰক্ষী বিষয়াই জনায়।
ইয়াৰ লগে লগে বিগত বৰ্ষত অসমত হিমন্ত বিশ্ব শৰ্মা নেতৃত্বাধীন বিজেপি চৰকাৰ গঠনৰ পাছৰে পৰা জিম্মাৰ পৰা পলাবলৈ চেষ্টা কৰা বা জোৱানক আক্ৰমণ কৰাৰ সময়ত আৰক্ষীৰ কাৰ্যকলাপত মুঠ ৫৪ জন লোক নিহত হোৱাৰ লগতে কমেও ১৪০ জন লোক আহত হৈছে।
২০ জুনত ৰাজ্য চৰকাৰে এখন শপতনামাযোগে গৌহাটী উচ্চ ন্যায়ালয়ক জনাইছিল যে ৰাজ্যখনত “কোনো ন্যায় বহিৰ্ভূত হত্যাকাণ্ড” সংঘটিত হোৱা নাই।
