ঋতু পৰ্ণ শৰ্মা,নগাঁও :- আকাশবাণী নগাঁও কেন্দ্ৰৰ জনপ্ৰিয় অনুষ্ঠান সৌজন্যমূলক সাহিত্যৰ ব্যৱস্থাপনাত আৰু সদৌ অসম কবি সন্মিলনৰ অন্তৰ্ভুক্ত নগাঁও জিলা কবি সন্মিলনৰ সহযোগত শনিবাৰে(১১ছেপ্টেম্বৰ) অনুষ্ঠিত হয় দেৱ বৰাৰ দ্বিতীয় কাব্যগ্ৰন্থ “মেঘে ঢকা আকাশ”ৰ উন্মোচনী সভা ।
“নূপুৰ মোমাইদেউ”খ্যাত বিশিষ্ট শিশু সাহিত্যিক ত্ৰৈলোক্য ভট্টাচাৰ্য, কবি-গীতিকাৰ কেশৱ বৰা,নগাঁও জিলা কবি সন্মিলনৰ সভাপতি দিলীপ কুমাৰ নাথ,বিশিষ্ট কবি- আবৃত্তিকাৰ চিদানন্দ দেৱ গোস্বামী,আকাশবাণী নগাঁও কেন্দ্ৰৰ প্ৰচাৰণ কাৰ্যবাহী গৌতম নাথ,কবি-নাট্যকাৰ-শিশু সাহিত্যিক দুৰ্গেশ্বৰ বৰকটকী, প্ৰদীপ বৰা আৰু সদৌ অসম কবি সন্মিলনৰ কেন্দ্ৰীয় সাংগঠনিক সম্পাদক সঞ্জীৱ সাগৰ চৌধুৰীয়ে অংশগ্ৰহণ কৰা গ্ৰন্থ উন্মোচনী সভাখনিত কবিতা পাঠ কৰে আৰতি মেধি,ৰূপম নাথ,ৰাতুল দাস,লক্ষ্যজ্যোতি বৰা আৰু ভাস্কৰজ্যোতি দাসে ।
উল্লেখ্য যে মদাৰজ্যোতি আৰু ৰাহুল দেৱ বৰদলৈয়ে আঁতধৰা সভাখনৰ বাণীবন্ধন শ্ৰোতাসকলে অহা বুধবাৰ আৰু শুক্ৰবাৰে পুৱা ৯ঃ১৫ বজাত এফ.এম.বেণ্ডৰ ১০২.৭ মেগাহাৰ্টজত আকাশবাণী নগাঁও কেন্দ্ৰৰ জৰিয়তে শুনিবলৈ পাব ।
