অসম ভলীবল মিছন ১০০ ৰ উল্লেখনীয় পদক্ষেপঃ অভিজিৎ ভট্টাচাৰ্যৰ শপত বাক্য পাঠ

নলবাৰী:- অসম ভলীবল মিছন-১০০ ৰ মুখ্য উদ্যোক্তা, ভাৰতীয় ভলীবল দলৰ প্ৰাক্তন অধিনায়ক অভিজিৎ ভট্টাচাৰ্যই অসমৰ ভলীবল খেলুৱৈ সকলৰ মাজত  এক শপত বাক্য পাঠ কৰোৱাই। অসমৰ বিভিন্ন জিলাৰ প্ৰায় ৮০ টা ক্লাৱ/সংঘৰ এহেজাৰতকৈ অধিক খেলুৱৈয়ে যোৱা ২ আগষ্টত পুৱা ৯ বজাত একেলগে দেহৰ বাবে ক্ষতিকাৰক মাদক দ্ৰব্য সেৱন নকৰাৰ বাবে শপত গ্ৰহণ কৰে।

চাধা, বিড়ি, চিগাৰেট, গুটখা, মদ, ভাং ইত্যাদিৰ পৰা খেলুৱৈ সকলে বিৰত থাকি ভলীবল খেলৰ অনুশীলন কৰি নিজকে সুস্থ ৰাখি অসমৰ সকলো ভলীবল খেলুৱৈৰ লগত মিলি একেলগে ২৫ টা পুচ -আপ কৰি এটি সুন্দৰ স্বাস্থ্য পৰিবেশ সৃষ্টি কৰিবলৈ চেষ্টা কৰা কাৰ্যক ক্ৰীড়া প্ৰেমী ৰাইজে ভূয়সী প্ৰশংসা কৰিছে।

উল্লেখযোগ্য যে অসম মিছন-১০০ এ ইতিমধ্যে অসমত ভলীবলৰ এক জাগৰণ আনিবলৈ অহোপুৰুষাৰ্থ চেষ্টা অব্যাহত ৰাখিছে। লক ডাউনৰ সময়তো খেলুৱৈ সকলক বিভিন্ন কাৰ্যপন্থা হাতত লৈ  উৎসাহিত কৰা পৰিলক্ষিত হৈ আহিছে। আনকি খেলৰ সামগ্ৰী নোহোৱাকৈ ঘৰতে থাকি কিদৰে ভলীবল খেলৰ প্ৰাথমিক জ্ঞান লাভ কৰিব পাৰি সেয়াও ভাৰতীয় ভলীবল দলৰ প্ৰাক্তন অধিনায়ক অভিজিৎ ভট্টাচাৰ্যই অনলাইন যোগে নিজেই খেলুৱৈ সকলক শিকোৱাৰ ব্যৱস্থা অব্যাহত ৰাখিছে। অসম ভলীবল মিছন-১০০ ৰ উদ্দেশ্যই হল দেশৰ ভিতৰতে অসমক প্ৰথম ভলীবল খেলা ৰাজ্য হিচাপে গঢ়ি তোলা।