কংগ্ৰেছ আৰু আম আদমী পাৰ্টীয়ে শনিবাৰে আগন্তুক লোকসভা নিৰ্বাচনৰ বাবে দিল্লী, গুজৰাট, গোৱা আৰু হাৰিয়ানাত আসন ভাগ-বতৰাৰ ঘোষণা কৰে, যাৰ অধীনত আপে ৰাষ্ট্ৰীয় ৰাজধানীত চাৰিখন আৰু কংগ্ৰেছে তিনিখন আসনত প্ৰতিদ্বন্দিতা কৰিব। আপ দলটোৱে গুজৰাটৰ ভাৰুচ আৰু ভাৱনগৰ লোকসভা আসন আৰু হাৰিয়ানাৰ কুৰুক্ষেত্ৰতো প্ৰতিদ্বন্দিতা কৰিব। দুয়োটা দলে পঞ্জাৱত পৃথকে ১৩ খন লোকসভা আসনত প্ৰতিদ্বন্দিতা কৰাৰ সিদ্ধান্ত লৈছে, অৱশ্যে কংগ্ৰেছে চণ্ডিগড় লোকসভা সমষ্টিত প্ৰাৰ্থী প্ৰদান কৰিব। যোৱা কেইদিনমানৰ ভিতৰত বিৰোধী মিত্ৰজোঁট আৰু ‘ইণ্ডিয়া’ ৰ অংশীদাৰসকলৰ মাজত আসন ভাগ-বতৰা সম্পৰ্কীয় এইটো দ্বিতীয় গুৰুত্বপূৰ্ণ ঘোষণা ।
২১ ফেব্ৰুৱাৰীত, উত্তৰ প্ৰদেশত সমাজবাদী পাৰ্টি আৰু কংগ্ৰেছৰ মাজত আসন বিতৰণ চুক্তি ঘোষণা কৰা হয়। উত্তৰ প্ৰদেশৰ ৮০ খন লোকসভা আসনৰ ভিতৰত, কংগ্ৰেছে ১৭ খন আসনত প্ৰতিদ্বন্দিতা কৰিব। জ্যেষ্ঠ বিজেপি নেতা আৰু কেন্দ্ৰীয় মন্ত্ৰী হৰদীপ সিং পুৰীয়ে কয় যে কংগ্ৰেছ আৰু আপৰ মিত্ৰতা এটা সুবিধাবাদী মিত্ৰতা। জ্যেষ্ঠ কংগ্ৰেছ নেতা মুকুল ৱাছনিকে আম আদমী পাৰ্টিৰ নেতা সন্দীপ পাঠক, সৌৰভ ভৰদ্বাজ আৰু আতিশীৰ সৈতে এক যুটীয়া সংবাদমেলত আসন ভাগ-বতৰাৰ ব্যৱস্থা ঘোষণা কৰে। দিল্লী কংগ্ৰেছৰ ভাৰপ্ৰাপ্ত বিষয়া দীপক বাবাৰিয়া আৰু পিচিচি সভাপতি অৰবিন্দৰ সিং লাভলীও অনুষ্ঠানটোত উপস্থিত আছিল।
সংবাদমেলত কয় – দিল্লীত আম আদমী পাৰ্টীয়ে চাৰিখন আৰু কংগ্ৰেছে তিনিখন আসনত প্ৰতিদ্বন্দিতা কৰিব। আপে দক্ষিণ দিল্লী, পশ্চিম দিল্লী, পূব দিল্লী আৰু নতুন দিল্লী লোকসভা আসনত প্ৰতিদ্বন্দিতা কৰিব, আনহাতে কংগ্ৰেছে চান্দনী চক, উত্তৰ পশ্চিম দিল্লী আৰু উত্তৰ-পূব দিল্লীৰ আসনত প্ৰতিদ্বন্দিতা কৰিব। উল্লেখ্য যে ৰাষ্ট্ৰীয় ৰাজধানীত সাতখন লোকসভা আসন আছে। যোৱা লোকসভা নিৰ্বাচনত, সকলো আসন ভাৰতীয় জনতা পাৰ্টীয়ে (বিজেপি) জিকিছিল।
ৱাছনিকে কয় যে আপ দলটোৱে গুজৰাটৰ ভাৰুচ আৰু ভাৱনগৰ লোকসভা আসনত প্ৰতিদ্বন্দিতা কৰিব আৰু হাৰিয়ানাৰ কুৰুক্ষেত্ৰকো দলটোক দিয়া হৈছে। গুজৰাটত ২৬ খন লোকসভা আসন আছে। কংগ্ৰেছে ২৪ খন আসনত প্ৰতিদ্বন্দিতা কৰিব। হাৰিয়ানাত ১০ খন লোকসভা আসন আছে আৰু কংগ্ৰেছে ইয়াৰে ৯ খন আসনত প্ৰতিদ্বন্দিতা কৰিব।
