কংগ্ৰেছৰ দুই জ্যেষ্ঠ নেতা গৌৰৱ গগৈ আৰু ৰকিবুল হুছেইনৰ বিৰুদ্ধে আজি গুৱাহাটীত তীব্ৰ আক্ৰমণাত্মক হৈ পৰিল মুখ্যমন্ত্ৰী হিমন্ত বিশ্ব শৰ্মা। সংবাদ মাধ্যমৰ আগত বিৰোধীৰ দুই প্ৰভাৱশালী নেতাক সমালোচনা কৰি তেওঁ দাবী কৰে যে এই দুই নেতাই দলটোক ধ্বংসৰ দিশলৈ লৈ যাব আৰু তেওঁলোক কংগ্ৰেছত থকালৈকে ইয়াৰ পৰা বিজেপিহে লাভান্বিত হ’ব।
মুখ্যমন্ত্ৰীয়ে কয়, “গৌৰৱ গগৈ আৰু ৰকিবুল হুছেইনে কংগ্ৰেছ দলটোক ধ্বংস কৰিব। তেওঁলোক কংগ্ৰেছত থকালৈকে বিজেপিৰহে লাভ হ’ব।” দেশৰ ৰাজনীতিৰ প্ৰসংগ টানি তেওঁ লগতে কয় যে যেতিয়ালৈকে ৰাহুল গান্ধী কংগ্ৰেছত থাকিব, তেতিয়ালৈকে প্ৰধানমন্ত্ৰী নৰেন্দ্ৰ মোদীয়েই ক্ষমতা লাভ কৰি যাব।
আগন্তুক নিৰ্বাচনৰ বাবে শাসকীয় বিজেপিৰ প্ৰস্তুতিৰ কথা উল্লেখ কৰি মুখ্যমন্ত্ৰীয়ে জানিবলৈ দিয়ে যে অহা ১১ৰ পৰা ১৫ মাৰ্চৰ ভিতৰত দলটোৱে প্ৰাৰ্থী তালিকা চূড়ান্ত কৰিব। নিৰ্বাচন আয়োগে যদি ভোটগ্ৰহণৰ দিন পিছুৱাই দিয়ে, তেন্তে দলটোৱে যাত্ৰাৰ তৃতীয় পৰ্যায় আৰম্ভ কৰিব। তেওঁ কয়, “আমি ১১ৰ পৰা ১৫ মাৰ্চৰ ভিতৰত প্ৰাৰ্থী তালিকা চূড়ান্ত কৰিবই লাগিব। তাৰ পাছত পৰিস্থিতি সাপেক্ষে আমি নিৰ্বাচনী যাত্ৰা অব্যাহত ৰাখিম।”
শেহতীয়া ভ্ৰমণৰ সময়ত কংগ্ৰেছে বাধা দিয়াৰ চেষ্টা কৰা বুলি অভিযোগ উত্থাপন কৰি মুখ্যমন্ত্ৰীয়ে বিৰোধীৰ অস্তিত্বক লৈও প্ৰশ্ন তোলে। তেওঁৰ দাবী অনুসৰি, ৰাজ্যৰ গৰিষ্ঠসংখ্যক অঞ্চলত কংগ্ৰেছৰ কোনো প্ৰভাৱ নাই। তেওঁ কয়, “সনাতনী, আদিবাসী, হিন্দু আৰু অসমীয়া লোকসকল বাস কৰা অঞ্চলত মই কংগ্ৰেছৰ কোনো প্ৰভাৱ দেখা নাই। মোৰ ভ্ৰমণৰ সময়ত তেওঁলোকে কিছুমান অঞ্চলত অনাহকতে সমস্যা সৃষ্টিৰ চেষ্টা কৰিছিল।”
নিৰ্বাচনী বতাহ গৰম হোৱাৰ সময়তে মুখ্যমন্ত্ৰীৰ এই আক্ৰমণাত্মক স্থিতি এতিয়া চৰ্চাৰ কেন্দ্ৰবিন্দু হৈ পৰিছে। শাসকীয় দলটোৰ আত্মবিশ্বাস আৰু বিৰোধীৰ প্ৰতি থকা এনে কঠোৰ মনোভাৱে আগন্তুক নিৰ্বাচনী যুঁজখন অধিক আমোদজনক কৰি তুলিছে।
About the Author
