টাটা ষ্ট্ৰাইভ আৰু এয়াৰবাছ ইণ্ডিয়াৰ অংশীদাৰিত্বৰে দিল্লী আৰু বেংগালুৰুত সাজু কৰা দুটা দক্ষতা বিকাশ কেন্দ্ৰ আনুষ্ঠানিকভাৱে উদ্বোধন কৰিলে কেন্দ্ৰীয় দক্ষতা বিকাশ আৰু উদ্যমিতা বিভাগৰ স্বতন্ত্ৰ ৰাজ্যিক মন্ত্ৰী জয়ন্ত চৌধুৰীয়ে। এই কেন্দ্ৰ দুটাৰ লক্ষ্য হৈছে যুৱক-যুৱতীসকলক তথ্যপ্ৰযুক্তি, ইলেক্ট্ৰনিক্স আৰু বিমান পৰিবহণৰ দৰে খণ্ডত ভৱিষ্যতৰ বাবে সাজু দক্ষতাৰে সজ্জিত কৰি তোলা, য’ত এডব্লিউএছ ক্লাউড কম্পিউটিং, জুনিয়ৰ ফুল ষ্টেক ডেভেলপাৰ আৰু চাইবাৰ সুৰক্ষাৰ দৰে পাঠ্যক্ৰম আগবঢ়োৱা হয়। অনুষ্ঠানটোত ভাষণ প্ৰদান কৰি চৌধুৰীয়ে দক্ষতা উন্নীতকৰণ পদক্ষেপসমূহক উদ্যোগৰ প্ৰয়োজনীয়তাৰ সৈতে সংৰেখিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰি কয় যে, “এই সহযোগিতাই আমাৰ যুৱক-যুৱতীসকলক এৰোস্পেচ আৰু প্ৰতিৰক্ষাৰ দৰে গুৰুত্বপূৰ্ণ ক্ষেত্ৰৰ সৈতে সংযোজিত দক্ষতাৰে সজ্জিত কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে চিহ্নিত হৈছে। স্থানীয় দাবী বা প্ৰয়োজনীয়তাসমূহৰ প্ৰতি আমাৰ দৃষ্টিভংগী সমুখত ৰাখি সকলোৰে সুবিধা হোৱাকৈ আমি বিভিন্ন ভৌগোলিক বিষয়ৰ বিবিধ ব্যক্তিসকলৰ বাবে অৰ্থপূৰ্ণ সুযোগ সৃষ্টিৰ প্ৰয়াস কৰিছোঁ।”
দ্বাৰকা (দিল্লী) আৰু নাগাৱাৰা (বেংগালুৰু)ত অৱস্থিত এই কেন্দ্ৰসমূহৰ লক্ষ্য হৈছে আগন্তুক ৩ বছৰত অৰ্থনৈতিকভাৱে পিছপৰা অঞ্চলৰ ৯০০ৰো অধিক যুৱক-যুৱতীৰ দক্ষতা বৃদ্ধি কৰা। এই পদক্ষেপ টাটা ষ্ট্ৰাইভৰ বৃহত্তৰ অভিযানৰ অন্যতম অংশ। ইয়াৰ জৰিয়তে বিশেষভাৱে মহিলা, বিশেষভাৱে সক্ষম ব্যক্তি আৰু প্ৰান্তীয় অঞ্চলৰ লোকসকলক বহনক্ষম জীৱিকাৰ সুযোগ প্ৰদান কৰাৰ লক্ষ্য হাতত লোৱা হৈছে।
এই প্ৰয়াসে গুৱাহাটীৰ দৰে চহৰসমূহৰ বাবে গুৰুত্বপূৰ্ণ সম্ভাৱনা কঢ়িয়াই আনিছে। এনে ধৰণৰ কেন্দ্ৰৰ জৰিয়তে অসমৰ বিভিন্ন গাঁও-চহৰসমূহে অধিক দক্ষ প্ৰতিভাৰ দ্বাৰা লাভান্বিত হ’ব পাৰে, লগতে অধিক উদ্যোগীক আকৰ্ষিত কৰিব পাৰে আৰু এনে পদক্ষেপসমূহে স্থানীয় নিবনুৱাসকলক প্ৰত্যাহ্বানৰ সৈতে মোকাবিলা কৰাত সহায় কৰিব পাৰে। অনুষ্ঠানত উপস্থিত থকা অন্যান্য বিশিষ্ট ব্যক্তিসকলৰ ভিতৰত অন্যতম হৈছে এমএছডিইৰ যুটীয়া সচিব সোনাল মিশ্ৰ আৰু এয়াৰবাছ ইণ্ডিয়া আৰু দক্ষিণ এছিয়াৰ অধ্যক্ষ ৰেমি মেইলাৰ্দ।
