প্ৰাণৰ শিল্পী জুবিন গাৰ্গৰ মৰ্মান্তিক মৃত্যুৰ পাছত সৃষ্টি হোৱা আইনী প্ৰক্ৰিয়াক অধিক ক্ষিপ্ৰ কৰাৰ বাবে এতিয়া সৰৱ হৈ পৰিছে সদৌ অসম ছাত্ৰ সন্থা। শিল্পীগৰাকীৰ হত্যাকাণ্ডৰ ন্যায় বিচাৰি আছুৱে দেওবাৰে মুখ্যমন্ত্ৰী ড° হিমন্ত বিশ্ব শৰ্মালৈ এক জৰুৰী পত্ৰ প্ৰেৰণ কৰে। পত্ৰখনৰ জৰিয়তে ছাত্ৰ সন্থাই জুবিন গাৰ্গৰ ন্যায় প্ৰক্ৰিয়া ত্বৰান্বিত কৰিবলৈ এখন বিশেষ আদালত গঠন কৰাৰ লগতে চৰকাৰৰ ফালৰ পৰা এদল অভিজ্ঞ জ্যেষ্ঠ অধিবক্তাক নিযুক্তি দিবলৈ পোনপটীয়া দাবী জনায়।
অসম চৰকাৰে গঠন কৰি দিয়া বিশেষ তদন্তকাৰী গোটে ইতিমধ্যে আদালতত অভিযোগনামা দাখিল কৰিছে, য’ত শিল্পীগৰাকীৰ মৃত্যুক এক হত্যাকাণ্ড বুলি স্পষ্টকৈ উল্লেখ কৰা হৈছে। বৰ্তমান আদালতত ইয়াৰ শুনানি প্ৰক্ৰিয়া চলি আছে যদিও অভিযুক্ত পক্ষই নিজৰ প্ৰতিৰক্ষাৰ বাবে আগশাৰীৰ অধিবক্তা নিয়োগ কৰাৰ পৰিপ্ৰেক্ষিতত চৰকাৰী পক্ষ অধিক শক্তিশালী হোৱাটো প্ৰয়োজনীয় হৈ পৰিছে। এই বিষয়ত গুৰুত্ব প্ৰদান কৰি আছুৰ সভাপতি উৎপল শৰ্মা আৰু সাধাৰণ সম্পাদক সমীৰণ ফুকনে মুখ্যমন্ত্ৰীক শীঘ্ৰেই এদল অভিজ্ঞ ফৌজদাৰী অধিবক্তাক ‘বিশেষ চৰকাৰী অধিবক্তা’ হিচাপে নিয়োগ কৰিবলৈ আহ্বান জনায়।
তদুপৰি, ছাত্ৰ সন্থাই উচ্চ ন্যায়ালয়ৰ সৈতে যোগাযোগ কৰি এই গোচৰৰ বাবে এক সুকীয়া আইনী মঞ্চ প্ৰস্তুত কৰিবলৈ চৰকাৰক ফলপ্ৰসূ পদক্ষেপ ল’বলৈ অনুৰোধ জনাইছে। উল্লেখযোগ্য যে, জুবিন গাৰ্গৰ মৃত্যুক লৈ সমগ্ৰ ৰাজ্যতে আৱেগিক পৰিৱেশ বিৰাজ কৰি থকাৰ সময়তে মুখ্যমন্ত্ৰীয়েও ইয়াৰ পূৰ্বে দোষীক উচিত শাস্তি দিয়াৰ প্ৰতিশ্ৰুতি দিছিল। আছুৰ মতে, হত্যাকাৰীয়ে যাতে কোনো কাৰণতে সাৰি যাব নোৱাৰে, তাৰ বাবে চৰকাৰে এতিয়া অধিক সক্ৰিয়তা প্ৰদৰ্শন কৰাৰ সময় আহি পৰিছে।
About the Author
