নিশাৰ অন্ধকাৰ ফালি হোৱা গুলীবৰ্ষণৰ এক ঘটনাই এতিয়া দক্ষিণ কৰিমগঞ্জৰ দক্ষিণ হাফানী গাঁৱত তীব্ৰ আতংকৰ সৃষ্টি কৰে। এটা মোবাইল ফোন চুৰি হোৱাক কেন্দ্ৰ কৰি সৃষ্টি হোৱা বিবাদৰ পৰিণতিতে দুৰ্বৃত্তই এইদৰে গুলীচালনা কৰে বুলি আৰক্ষীৰ প্ৰাথমিক তদন্তত প্ৰকাশ পাইছে। এই আক্ৰমণত দুজন লোক গুৰুতৰভাৱে আহত হোৱাত সমগ্ৰ অঞ্চলটোত উত্তেজনা বিৰাজ কৰিছে।
প্ৰত্যক্ষদৰ্শীৰ ভাষ্য অনুসৰি, কেইবা জাঁই গুলীৰ শব্দই অঞ্চলটোৰ নিস্তব্ধতা ভংগ কৰাৰ লগে লগে আৰক্ষীৰ দল ঘটনাস্থলীত উপস্থিত হয়। তদন্তকাৰী বিষয়াই ঘটনাস্থলীৰ পৰা কেইবাটাও খালী কাৰ্টিজ উদ্ধাৰ কৰিছে, যিয়ে গুলীবৰ্ষণৰ তীব্ৰতা প্ৰমাণ কৰে। আহতসকলৰ এজনক আনোৱাৰ হুছেইন বুলি চিনাক্ত কৰা হৈছে যদিও দ্বিতীয়জনৰ পৰিচয় এতিয়াও নিশ্চিত হোৱা নাই। বৰ্তমান দুয়োকে সংকটজনক অৱস্থাত চিকিৎসালয়ত ভৰ্তি কৰা হৈছে।
ইফালে ঘটনাৰ খবৰ পোৱাৰ লগে লগে জিলা আৰক্ষী অধীক্ষক লীনা দলে ঘটনাস্থলীত উপস্থিত হৈ পৰিস্থিতিৰ বুজ লয়। প্ৰাথমিক অনুসন্ধানত এই আক্ৰমণত দুটা পিষ্টল ব্যৱহাৰ কৰা হৈছে বুলি সন্দেহ কৰা হৈছে। আৰক্ষীয়ে ইতিমধ্যে অঞ্চলটোত নিৰাপত্তা ব্যৱস্থা কটকটীয়া কৰিছে আৰু দোষীক কৰায়ত্ত কৰিবলৈ এক ব্যাপক অভিযান আৰম্ভ কৰিছে।
About the Author
