চীন ভ্ৰমণলৈ যাব প্ৰধানমন্ত্ৰী নৰেন্দ্ৰ মোদী

চীনৰ বৈদেশিক মন্ত্ৰী ৱাং য়ীৰ সৈতে আলোচনাৰ সময়ত মঙলবাৰে ৰাষ্ট্ৰীয় নিৰাপত্তা উপদেষ্টা অজিত ডোভালে কয় যে প্ৰধানমন্ত্ৰী নৰেন্দ্ৰ মোদীয়ে আগন্তুক চাংহাই সহযোগিতা সংস্থাৰ শীৰ্ষ সন্মিলনত অংশগ্ৰহণ কৰিবলৈ চীন ভ্ৰমণ কৰিব। সীমান্ত বিষয়ক বিশেষ প্ৰতিনিধি পৰ্যায়ৰ আলোচনাৰ শেহতীয়া সংস্কৰণত টেলিভিছনযোগে দিয়া ভাষণত ডোভালে ভাৰত-চীন সম্পৰ্কত নতুন শক্তি আৰু গতিবেগৰ লগতে সীমান্তত শান্তিৰ গুৰুত্বৰ ওপৰত আলোকপাত কৰে। ডোভালে কয় যে সীমান্তত শান্তি আৰু সম্প্ৰীতি বিৰাজ কৰিছে। তেওঁ কয় যে দুয়োখন দেশৰ মাজত দ্বিপাক্ষিক সম্পৰ্ক এতিয়া অধিক শক্তিশালী হৈছে। এন এছ এয়ে কয় যে আমাৰ প্ৰধানমন্ত্ৰীয়ে এছ চি অ’ শীৰ্ষ সন্মিলনৰ বাবে চীন ভ্ৰমণ কৰিব আৰু সেয়েহে আজিৰ আলোচনাৰ বিশেষ তাৎপৰ্য আছে।

৩১ আগষ্ট আৰু ১ ছেপ্টেম্বৰত অনুষ্ঠিত হ’বলগীয়া শীৰ্ষ সন্মিলনত অংশগ্ৰহণৰ বাবে চীনৰ টিয়ানজিন চহৰলৈ মোদীৰ ভ্ৰমণৰ এইটোৱেই প্ৰথম আনুষ্ঠানিক নিশ্চিতকৰণ। ডোভালে আশা প্ৰকাশ কৰে যে ২৪ সংখ্যক বিশেষ প্ৰতিনিধি (এছ আৰ) আলোচনা সফল হ’ব। মূলতঃ ড’ভালৰ সৈতে বিশেষ প্ৰতিনিধি পৰ্যায়ৰ আলোচনাত মিলিত হ’বলৈ সোমবাৰে দিল্লীত উপস্থিত হয় চীনৰ বৈদেশিক মন্ত্ৰীগৰাকী। ২০২০ চনত গালৱান উপত্যকাৰ সংঘৰ্ষৰ পিছত তীব্ৰ চাপৰ সন্মুখীন হোৱা চুবুৰীয়া দেশ দুখনৰ সম্পৰ্ক পুনৰ স্থাপনৰ বাবে চলি থকা প্ৰচেষ্টাৰ অংশ হিচাপে ৱাঙৰ এই ভ্ৰমণক লক্ষ্য কৰা হৈছে।

বিশেষ প্ৰতিনিধি পৰ্যায়ৰ আলোচনাত দুয়োপক্ষই নতুন আত্মবিশ্বাস গঢ়ি তোলা ব্যৱস্থাৰ বিষয়ে আলোচনা কৰাৰ উপৰিও বাস্তৱিক নিয়ন্ত্ৰণ ৰেখাৰ (এল এ চি) সামগ্ৰিক পৰিস্থিতিৰ পৰ্যালোচনা কৰাৰ সম্ভাৱনা আছে। যদিও দুয়োপক্ষই ঘৰ্ষণ বিন্দুৰ পৰা সৈন্য আঁতৰ কৰিছে, সীমান্তৰ পৰা ফ্ৰণ্টলাইন সৈন্য প্ৰত্যাহাৰ কৰি পৰিস্থিতি স্বাভাৱিক কৰাটো এতিয়াও সম্ভৱ হোৱা নাই। বৰ্তমান পূব লাডাখ অঞ্চলৰ এল এ চিৰ কাষত দুয়োখন দেশৰ প্ৰায় ৫০ৰ পৰা ৬০ হাজাৰ সৈন্য নিয়োজিত হৈ আছে।