অসমৰ বিধানসভা নিৰ্বাচনৰ দিন চমু চাপি অহাৰ সময়তে ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ সমষ্টি জালুকবাৰীৰ ভোটাৰ তালিকাক লৈ আজি প্ৰকাশ পালে এক বিশেষ তথ্য।
সোমবাৰে নিৰ্বাচন আয়োগে প্ৰকাশ কৰা চূড়ান্ত ভোটাৰ তালিকা অনুসৰি, জালুকবাৰী সমষ্টিৰ পৰা ৪,৩১০ গৰাকী ভোটাৰৰ নাম কৰ্তন কৰা হৈছে। যোৱা ডিচেম্বৰ মাহৰ শেষৰ সপ্তাহত প্ৰকাশিত খচৰা তালিকাৰ তুলনাত এইটো ২.০৫ শতাংশ হ্ৰাস পাইছে বুলি বিষয়াসকলে জানিবলৈ দিয়ে। বৰ্তমান সমষ্টিটোত মুঠ ভোটাৰৰ সংখ্যা ২,১০,৬২৪ গৰাকীলৈ হ্ৰাস পাইছে।
চূড়ান্ত ভোটাৰ তালিকাৰ তথ্য অনুসৰি, জালুকবাৰীত এতিয়া ১,০৮,৬৫৪ গৰাকী পুৰুষ, ৯৭,৬৫৩ গৰাকী মহিলা আৰু ৭ গৰাকী তৃতীয় লিংগৰ ভোটাৰ আছে।
খচৰা তালিকাত থকা ২,৭৫৪ গৰাকী পুৰুষ, ১,৫৫৫ গৰাকী মহিলা আৰু এগৰাকী তৃতীয় লিংগৰ ভোটাৰৰ নাম সংশোধন প্ৰক্ৰিয়াৰ সময়ত কৰ্তন কৰা হয়। কেৱল জালুকবাৰীতেই নহয়, সমগ্ৰ কামৰূপ মহানগৰ জিলাতে মুঠ ২৫,৯৩২ গৰাকী ভোটাৰৰ নাম চূড়ান্ত তালিকাৰ পৰা বাদ পৰিছে, যাৰ ফলত জিলাখনত ভোটাৰৰ সংখ্যা ২.৪১ শতাংশ হ্ৰাস পাইছে।
অহা মাৰ্চ-এপ্ৰিল মাহত ৰাজ্যৰ ১২৬ খন আসনৰ বাবে অনুষ্ঠিত হ’বলগীয়া এই নিৰ্বাচন যথেষ্ঠ গুৰুত্বপূৰ্ণ, কাৰণ যোৱা বছৰ সম্পূৰ্ণ হোৱা সমষ্টি পুনৰ নিৰ্ধাৰণৰ পাছত এয়া হ’ব প্ৰথমটো বিধানসভা নিৰ্বাচন।
যিসকল ভোটাৰৰ নাম তালিকাৰ পৰা কৰ্তন হৈছে, তেওঁলোকে ১৫ দিনৰ ভিতৰত জিলা দণ্ডাধীশৰ ওচৰত আবেদন কৰিব পাৰিব।
উল্লেখ্য যে ২০০১ চনৰ পৰা ধাৰাবাহিকভাৱে পাঁচবাৰকৈ জালুকবাৰীক প্ৰতিনিধিত্ব কৰি অহা হিমন্ত বিশ্ব শৰ্মাৰ বাবে এই সমষ্টিটো এক দুৰ্ভেদ্য দুৰ্গ হিচাপে পৰিচিত।
About the Author
