অসমত শান্তি আৰু স্থিৰতা ঘূৰাই অনাৰ লক্ষ্যৰে চৰকাৰে গ্ৰহণ কৰা বিশেষ উদ্যোগৰ ফলত ৰাজ্যত ২০২১ চনৰ পৰা বৰ্তমানলৈকে মুঠ ৯,০২২ গৰাকী উগ্ৰপন্থীয়ে মূল সুঁতিলৈ উভতি আহিছে। বিধানসভাৰ বাজেট অধিৱেশনৰ দ্বিতীয় দিনা মঙলবাৰে ২০২৬-২৭ বৰ্ষৰ অন্তৱৰ্তীকালীন বাজেট উত্থাপন কৰি বিত্তমন্ত্ৰী অজন্তা নেওগে সদনত এই গুৰুত্বপূৰ্ণ তথ্য সদৰী কৰে। চৰকাৰে গ্ৰহণ কৰা ধাৰাবাহিক শান্তি আলোচনা আৰু আত্মসমৰ্পণ নীতিৰ ফলতেই ১,০১২ টা অত্যাধুনিক মাৰণাস্ত্ৰও উদ্ধাৰ কৰা হৈছে বুলি তেওঁ উল্লেখ কৰে।
বিত্তমন্ত্ৰীগৰাকীয়ে সদনত ভাষণ প্ৰদান কৰি কয় যে যোৱা পাঁচটা বছৰত চৰকাৰে আলফা, ডিএনএলএৰ লগতে কাৰ্বি আৰু আদিবাসী গোটসমূহৰ সৈতে মুঠ চাৰিখনকৈ শান্তি চুক্তি স্বাক্ষৰ কৰিবলৈ সক্ষম হৈছে। এই চুক্তিসমূহৰ জৰিয়তে বিভ্ৰান্ত যুৱকসকলক সংস্থাপন দিয়াৰ বাবে চৰকাৰে পুনৰ্সংস্থাপন আঁচনিৰ অধীনত ৪ লাখ টকাৰ ফিক্সড ডিপজিট, মাহিলী জলপানী আৰু উপাৰ্জনৰ বাবে বিভিন্ন সাহায্য আগবঢ়াইছে। কেন্দ্ৰীয় চৰকাৰেও ২০২৩ চনৰ আলফা শান্তি চুক্তিৰ অধীনত বিশেষ উন্নয়ন পেকেজৰ প্ৰথমটো কিস্তি হিচাপে ৫০০ কোটি টকা ধাৰ্য কৰিছে।
কেৱল শান্তি চুক্তিয়েই নহয়, ৰাজ্যৰ আভ্যন্তৰীণ নিৰাপত্তা আৰু ড্ৰাগছ বিৰোধী অভিযানৰ ক্ষেত্ৰতো চৰকাৰৰ সফলতাৰ খতিয়ান দাঙি ধৰে নেওগে। তেওঁ জনোৱা মতে, যোৱা পাঁচ বছৰত ২৪ হাজাৰৰো অধিক অপৰাধীক গ্ৰেপ্তাৰ কৰাৰ লগতে ৩ হাজাৰ কোটি টকাৰো অধিক মূল্যৰ ড্ৰাগছ জব্দ কৰা হৈছে। ইয়াৰ উপৰি, ২০২১ চনৰ পৰা ৰাজ্যৰ প্ৰায় ১.৪৫ লাখ বিঘা চৰকাৰী ভূমি বেদখলকাৰীৰ কৱলৰ পৰা মুক্ত কৰা হৈছে বুলিও তেওঁ বাজেট ভাষণত গৌৰৱেৰে উল্লেখ কৰে।
About the Author
