বৈদেশিক পৰিক্ৰমা আৰু বস্ত্ৰ বিভাগৰ কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটাই ব্ৰাজিলৰ চাও পাওলোৰ পৰা লেটিন আমেৰিকালৈ চৰকাৰী ভ্ৰমণ আৰম্ভ কৰিছে। মন্ত্ৰী মাৰ্ঘেৰিটাৰ বহু-ৰাষ্ট্ৰ ভ্ৰমণত উৰুগুৱে, বাহামাছ, বাৰ্বাডোচ আৰু নিকাৰাগুৱাও অন্তৰ্ভুক্ত থাকিব, যিয়ে কূটনৈতিক আৰু অৰ্থনৈতিক সম্পৰ্ক শক্তিশালী কৰাৰ ওপৰত গুৰুত্ব আৰোপ কৰিব। চাও পাওলোত মন্ত্ৰীগৰাকীয়ে ভাৰত-ব্ৰাজিলৰ সম্পৰ্ক বৃদ্ধিৰ ক্ষেত্ৰত প্ৰবাসী ভাৰতীয়ৰ অৱদানক স্বীকাৰ কৰি ভাৰতীয় প্ৰব্ৰজনকাৰীসকলৰ সৈতে মত বিনিময় কৰে। ছ’চিয়েল মিডিয়া প্লেটফৰ্ম এক্সত নিজৰ অভিজ্ঞতা শ্বেয়াৰ কৰি মন্ত্ৰী মাৰ্ঘেৰিটাই কয় যে, “চাও পাওলোৰ ভাৰতীয় সম্প্ৰদায়ৰ সৈতে মত বিনিময় কৰি যথেষ্ট আনন্দিত হৈছোঁ। ভাৰত আৰু ব্ৰাজিলৰ মাজত শক্তিশালী সম্পৰ্ক গঢ়ি তোলা আৰু লেটিন আমেৰিকাত ভাৰতৰ উপস্থিতি সম্প্ৰসাৰণৰ ক্ষেত্ৰত প্ৰবাসী ভাৰতীয়সকলৰ প্ৰচেষ্টা প্ৰশংসনীয়।”
এই ভ্ৰমণৰ সময়ছোৱাত উৰুগুৱেৰ নৱনিৰ্বাচিত ৰাষ্ট্ৰপতি ইয়ামান্দু অৰ্চিৰ শপত গ্ৰহণ অনুষ্ঠানত উপস্থিত থাকিব। বাহামাছত মন্ত্ৰী মাৰ্ঘেৰিটাই যোৱা বছৰ গায়ানাত অনুষ্ঠিত দ্বিতীয় ভাৰত-কাৰিকম সন্মিলনৰ সময়ত আৰম্ভ কৰা দ্বিপাক্ষিক আলোচনাৰ পৰৱৰ্তী পদক্ষেপসমূহৰ পৰ্যালোচনা কৰিব। মন্ত্ৰী মাৰ্ঘেৰিটাৰ বহু ৰাষ্ট্ৰ ভ্ৰমণৰ সামৰণি পৰিব নিকাৰগুৱাত। উল্লেখ্য যে, পৱিত্ৰ মাৰ্ঘেৰিটাৰ এই ভ্ৰমণ হৈছে মধ্য আমেৰিকাৰ ৰাষ্ট্ৰলৈ প্ৰথমবাৰৰ বাবে ভাৰতৰ মন্ত্ৰী পৰ্যায়ৰ ভ্ৰমণ।
ব্যৱসায়িক দৃষ্টিকোণৰ পৰা ভাৰতৰ সৈতে লেটিন আমেৰিকাৰ বৰ্ধিত বাণিজ্যিক সম্পৰ্কই গুৱাহাটীকে ধৰি সমগ্ৰ অসমৰ, বিশেষকৈ বস্ত্ৰ আৰু ৰপ্তানিৰ ক্ষেত্ৰত সুযোগ প্ৰদান কৰিব পাৰে। বৰ্ধিত বৈশ্বিক প্ৰসাৰৰ সমান্তৰালভাৱে অসমৰ স্থানীয় উদ্যোগসমূহে এই অঞ্চলত ভাৰতৰ সম্প্ৰসাৰিত পদচিহ্নৰ সৈতে সংগতি ৰাখি বিনিয়োগ আৰু বাণিজ্যৰ বাবে নতুন পথৰ অন্বেষণ কৰিব পাৰে।
