দেশৰ দৰিদ্ৰ জনসাধাৰণৰ কৰ্মসংস্থাপনৰ অধিকাৰক কেন্দ্ৰ কৰি বৰ্তমান ৰাজনৈতিক মহলত এক তীব্ৰ বিতৰ্কৰ সূত্ৰপাত ঘটিছে। কংগ্ৰেছ সংসদীয় দলৰ মুৰব্বী ছোনিয়া গান্ধীয়ে এখন আগশাৰীৰ ইংৰাজী দৈনিকত লিখা এটা প্ৰবন্ধৰ জৰিয়তে কেন্দ্ৰীয় চৰকাৰক লক্ষ্য কৰি লৈছে। তেওঁ অভিযোগ কৰে যে চৰকাৰে মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিতকৰণ আইন (MGNREGA) আৰু অন্যান্য গুৰুত্বপূৰ্ণ আইনসমূহৰ পৰিৱৰ্তন ঘটাই জনসাধাৰণৰ অধিকাৰ খৰ্ব কৰাৰ এক চক্ৰান্ত ৰচনা কৰিছে। তেওঁৰ মতে, গ্ৰাম্য নিয়োগ আঁচনিখন দুৰ্বল কৰাৰ এই প্ৰয়াসে দেশৰ কোটি কোটি শ্ৰমজীৱী লোকৰ বাবে এক ভয়ংকৰ বিত্তীয় আৰু মানৱীয় সংকট কঢ়িয়াই আনিব।
ছোনিয়া গান্ধীৰ মতে, MGNREGA কেৱল এক কল্যাণমূলক আঁচনি নাছিল, ই আছিল গ্ৰাম্য পৰিয়ালসমূহৰ জীৱিকাৰ নিৰাপত্তা আৰু মৰ্যাদাৰ এক অধিকাৰভিত্তিক কাৰ্যসূচী। মহাত্মা গান্ধীৰ ‘সৰ্বোদয়’ৰ সপোন বাস্তৱায়িত কৰা এই আঁচনিখনৰ মৃত্যু হোৱাটো দেশৰ বাবে এক ‘সামূহিক নৈতিক ব্যৰ্থতা’ বুলি তেওঁ অভিহিত কৰে। তেওঁ সতৰ্ক কৰি দিয়ে যে ইয়াৰ ফলত আগন্তুক বছৰবোৰত শ্ৰমিক শ্ৰেণীয়ে চৰম দুৰ্ভোগ ভুগিবলগীয়া হ’ব পাৰে। সেয়েহে সকলোকে একগোট হৈ নিজৰ সুৰক্ষাৰ বাবে থকা এই অধিকাৰসমূহ ৰক্ষা কৰিবলৈ তেওঁ আহ্বান জনায়।
প্ৰবন্ধটোত তেওঁ কেৱল MGNREGAই নহয়, বৰঞ্চ শিক্ষাৰ অধিকাৰ আৰু বন অধিকাৰ আইনৰ দৰে মৌলিক বিষয়সমূহতো চৰকাৰে কুঠাৰঘাত কৰা বুলি দাবী কৰে। ২০২০ চনৰ ৰাষ্ট্ৰীয় শিক্ষানীতিৰ জৰিয়তে দেশৰ প্ৰায় এক লাখ প্ৰাথমিক বিদ্যালয় বন্ধ কৰি দিয়াৰ পথ প্ৰশস্ত কৰা বুলিও তেওঁ চৰকাৰক সমালোচনা কৰে। ইয়াৰ উপৰিও বন সংৰক্ষণ নিয়ম আৰু ভূমি অধিগ্ৰহণ আইনৰ সংশোধনৰ ফলত গাঁওসভাৰ ক্ষমতা হ্ৰাস পোৱাৰ লগতে কৃষকসকলৰ নূন্যতম সমৰ্থন মূল্যৰ অধিকাৰো বিপন্ন হোৱা বুলি তেওঁ উল্লেখ কৰে। ৰাষ্ট্ৰীয় খাদ্য সুৰক্ষা আইনখনো চৰকাৰৰ পৰৱৰ্তী লক্ষ্য হ’ব পাৰে বুলি তেওঁ আশংকা প্ৰকাশ কৰিছে।
About the Author
