হুল্লাডেক ৰিচাইক্লিং প্ৰাইভেট লিমিটেডে প্ৰদূষণ নিয়ন্ত্ৰণ ব’ৰ্ড, অসমৰ সহযোগত উত্তৰ-পূৰ্বাঞ্চলত গুৰুত্বপূৰ্ণ ই-আৱৰ্জনা প্ৰত্যাহ্বানৰ সৈতে সঠিকভাৱে মোকাবিলা কৰাৰ লক্ষ্যৰে গুৱাহাটীত ই-আৱৰ্জনা ব্যৱস্থাপনা সন্মিলন ২০২৪ৰ আয়োজন কৰে। এই সন্মিলনত কাৰ্যকৰী ই-আৱৰ্জনা ব্যৱস্থাপনা আৰু পুনঃ ব্যৱহাৰৰ ৰণনীতিৰ বিষয়ে আলোচনা কৰিবলৈ চৰকাৰী বিষয়া, কৰ্প’ৰেট গোষ্ঠীৰ প্ৰতিনিধি আৰু পৰিৱেশ কৰ্মীসহ গুৰুত্বপূৰ্ণ অংশীদাৰসকল একত্ৰিত হয়।
প্ৰদূষণ নিয়ন্ত্ৰণ ব’ৰ্ড, অসমৰ অধ্যক্ষ অৰূপ কুমাৰ মিশ্ৰই বহনক্ষম আৱৰ্জনা ব্যৱস্থাপনা পদক্ষেপৰ প্ৰয়োজনীয়তাৰ ওপৰত গুৰুত্ব আৰোপ কৰি কয় যে, “এই সন্মিলনে উত্তৰ-পূৰ্বাঞ্চলৰ ৰাজ্যসমূহত কাৰ্যকৰী ই-আৱৰ্জনা ব্যৱস্থাপনা লাভ কৰাৰ দিশত এক গুৰুত্বপূৰ্ণ পদক্ষেপ হিচাপে চিহ্নিত কৰিছে।” হুল্লাডেকৰ পৰিচালনা সঞ্চালক নন্দন মলে পৰিৱেশ অনুকূল সঠিক ব্যৱস্থাপনা পদ্ধতিৰ প্ৰতি প্ৰতিষ্ঠানটোৰ প্ৰতিশ্ৰুতিৰ ওপৰত আলোকপাত কৰে আৰু ট্ৰাষ্টমেট মেটেৰিয়েল এলএলপিৰ অংশীদাৰিত্বত গুৱাহাটীত এটা নতুন ৰিচাইক্লিং প্ৰকল্প স্থাপনৰ কথা ঘোষণা কৰে।
ই-আৱৰ্জনা ব্যৱস্থাপনাৰ বৰ্তমানৰ স্থিতি, নতুন নিয়ম বিধি চলা আৰু আঞ্চলিক প্ৰত্যাহ্বানসমূহ মোকাবিলা কৰাৰ বাবে হুল্লাডেকৰ পদক্ষেপসমূহৰ ওপৰত আলোচনাত সৰ্বাধিক গুৰুত্ব আৰোপ কৰা হয়। উঃ-পূবৰ বজাৰৰ দৃষ্টিকোণৰ পৰা গুৱাহাটী ই-আৱৰ্জনা পুনঃব্যৱহাৰৰ কেন্দ্ৰীয় হাব হিচাপে পৰিগণিত হ’বলৈ সাজু হৈছে, যাৰ ফলত ইলেক্ট্ৰনিক আৱৰ্জনা ফলপ্ৰসূভাৱে পৰিচালনা কৰাৰ লগতে সেউজ ভৱিষ্যতলৈ অৰিহণা যোগোৱাৰ লগতে অঞ্চলটোৰ সামৰ্থ বৃদ্ধি পোৱাৰ পূৰ্ণ সম্ভাৱনা আছে।
