ব্ৰাজিলৰ ক্লাব ফ্লুমিনেন্সে ফিফা ক্লাব বিশ্বকাপ ২০২৫ত নিজৰ আকৰ্ষণীয় অভিযান অব্যাহত ৰাখি শুকুৰবাৰে ছৌদি আৰৱৰ আল হিলালক ২-১ গ’লত পৰাস্ত কৰি ছেমি ফাইনেলত প্ৰৱেশ কৰে। প্ৰতিযোগিতাখনৰ আণ্ডাৰডগ বুলি গণ্য কৰা ফ্লুমিনেন্সে প্ৰথমাৰ্ধত মেথিউছ মাৰ্টিনেলিৰ এক সুন্দৰ গ’লৰ সহায়ত অগ্ৰগতি লাভ কৰে।
অৱশ্যে দ্বিতীয়ার্ধৰ আৰম্ভণিতে আল হিলালৰ হৈ মাৰ্কাছ লিওনাৰ্ডোৱে সমতা স্থাপন কৰে। কিন্তু ফ্লুমিনেন্সে হাৰ নামানিল আৰু ৭০ মিনিটত হাৰকিউলিছে নিৰ্ণায়ক গ’লটো দি নিজৰ দলটোক এক ঐতিহাসিক জয় প্ৰদান কৰে। এইটোৱেই আছিল দুয়োটা ক্লাবৰ মাজত প্ৰথম মুখামুখি। প্ৰতিযোগিতাখনত দুৰ্বল প্ৰতিদ্বন্দ্বী হিচাপে বিবেচিত হোৱা ফ্লুমিনেন্সে এতিয়া ছেমি ফাইনেলত পালমেইৰাছ আৰু চেলছীৰ মাজত অনুষ্ঠিত হ’বলগীয়া কোৱাৰ্টাৰ ফাইনেল মেচখনৰ বিজয়ীৰ সৈতে মুখামুখি হ’ব।
খেলখনৰ আৰম্ভণিতে এক আৱেগিক মুহূৰ্তত খেলুৱৈ আৰু দৰ্শকে এক মিনিটৰ বাবে মৌনতা অৱলম্বন কৰি লিভাৰপুলৰ পৰ্তুগীজ ফৰৱাৰ্ড ডিঅ’গো জোটা আৰু গাড়ী দুৰ্ঘটনাত মৃত্যু হোৱা তেওঁৰ কনিষ্ঠ ভাতৃ আন্দ্ৰে ছিলভাক শ্ৰদ্ধাঞ্জলি জনায়।
About the Author
