পাৰমাণৱিক অস্ত্ৰক লৈ আমেৰিকা আৰু চীনৰ মাজত পুনৰ উত্তেজনা বৃদ্ধি পাইছে। আমেৰিকাই অভিযোগ কৰিছে যে চীনে ছবছৰ পূৰ্বে ২০২০ চনত গোপন পাৰমাণৱিক পৰীক্ষা কৰিছিল। সোমবাৰে আমেৰিকাৰ বিদেশ মন্ত্ৰালয়ৰ সহকাৰী সচিব ক্রিষ্টোফাৰ ইউৱে কয় যে ২০২০ চনৰ ২২ জুনত পশ্চিম চীনৰ লপ নুৰ ভূগৰ্ভস্থ পাৰমাণৱিক পৰীক্ষা স্থানত বিস্ফোৰণ ঘটিছিল। চুবুৰীয়া ৰাষ্ট্ৰ কাজাখস্তানৰ এটা ষ্টেচনৰ পৰা ২.৭৫ মাত্ৰাৰ এই বিস্ফোৰণৰ তথ্য পোৱা যায়। ইউৱে ইয়াক পাৰমাণৱিক বিস্ফোৰণ বুলি অভিহিত কৰে। তেওঁ কয় যে ভূমিকম্পটো খনন বিস্ফোৰণতকৈ পৃথক আছিল। ই একক অগ্নি বিস্ফোৰণৰ দৰে আছিল, যিটো পাৰমাণৱিক পৰীক্ষাৰ বৈশিষ্ট্য। ইউৱে কয় যে চীনে ইচ্ছাকৃতভাৱে নিজৰ পাৰমাণৱিক শক্তি বৃদ্ধি কৰিছে। তেওঁ উল্লেখ কৰে যে ২০২০ চনৰ পৰা চীনৰ পাৰমাণৱিক অস্ত্ৰ ২০০ৰ পৰা ৬০০ৰো অধিক হৈছে।আনুমানিকভাৱে ২০৩০ চনৰ ভিতৰত এই সংখ্যা ১০০০ৰো অধিক হ’ব। এই দাবী উত্থাপন কৰা হৈছে যেতিয়া আমেৰিকা আৰু ৰাছিয়াৰ মাজত হোৱা শেষৰখন বৃহৎ পাৰমাণৱিক চুক্তি নিউ ষ্টাৰ্ট চুক্তিৰ ম্যাদ এই মাহতে শেষ হৈছিল। এই সন্ধিৰ অন্ত পৰাৰ লগে লগে বিশ্বৰ দুখন বৃহত্তম পাৰমাণৱিক শক্তিৰ অস্ত্ৰভাণ্ডাৰৰ সীমা অন্ত পৰে, যাৰ ফলত নতুন পাৰমাণৱিক অস্ত্ৰৰ দৌৰৰ আশংকা বৃদ্ধি পায়। আমেৰিকাই এতিয়া চীন আৰু ৰাছিয়াৰ পৰা বিপজ্জনক অস্ত্ৰৰ ক্ষেত্ৰত স্বচ্ছতা আৰু সীমাবদ্ধতাৰ দাবী জনাইছে যদিও চীনে এই অভিযোগসমূহক ভিত্তিহীন বুলি অভিহিত কৰিছে।
About the Author
